KHun phir KHun hai

zulm phir zulm hai baḌhtā hai to miT jaatā hai

ḳhuun phir ḳhuun hai Tapkegā to jam jā.egā

ḳhāk-e-sahrā pe jame yā kaf-e-qātil pe jame

farq-e-insāf pe yā pā-e-salāsil pe jame

teġh-e-be-dād pe yā lāsha-e-bismil pe jame

ḳhuun phir ḳhuun hai Tapkegā to jam jā.egā

laakh baiThe koī chhup-chhup ke kamīñ-gāhoñ meñ

ḳhuun ḳhud detā hai jalladoñ ke maskan kā surāġh

sāzisheñ laakh uḌātī rahīñ zulmat kī naqāb

le ke har buuñd nikaltī hai hathelī pe charāġh

zulm kī qismat-e-nākāra-o-rusvā se kaho

jabr kī hikmat-e-parkār ke iimā se kaho

mahmil-e-majlis-e-aqvām kī lailā se kaho

ḳhuun dīvāna hai dāman pe lapak saktā hai

sho.ala-e-tund hai ḳhirman pe lapak saktā hai

tum ne jis ḳhuun ko maqtal meñ dabānā chāhā

aaj vo kūcha o bāzār meñ aa niklā hai

kahīñ sho.ala kahīñ na.ara kahīñ patthar ban kar

ḳhuun chaltā hai to ruktā nahīñ sangīnoñ se

sar uThātā hai to dabtā nahīñ ā.īnoñ se

zulm kī baat hī kyā zulm kī auqāt hī kyā

zulm bas zulm hai āġhāz se anjām talak

ḳhuun phir ḳhuun hai sau shakl badal saktā hai

aisī shakleñ ki miTāo to miTā.e na bane

aaise sho.ale ki bujhāo to bujhā.e na bane

aaise na.are ki dabāo to dabā.e na bane

zulm phir zulm hai baDhta hai to miT jata hai

KHun phir KHun hai Tapkega to jam jaega

KHak-e-sahra pe jame ya kaf-e-qatil pe jame

farq-e-insaf pe ya pa-e-salasil pe jame

tegh-e-be-dad pe ya lasha-e-bismil pe jame

KHun phir KHun hai Tapkega to jam jaega

lakh baiThe koi chhup-chhup ke kamin-gahon mein

KHun KHud deta hai jalladon ke maskan ka suragh

sazishen lakh uDati rahin zulmat ki naqab

le ke har bund nikalti hai hatheli pe charagh

zulm ki qismat-e-nakara-o-ruswa se kaho

jabr ki hikmat-e-parkar ke ima se kaho

mahmil-e-majlis-e-aqwam ki laila se kaho

KHun diwana hai daman pe lapak sakta hai

shoala-e-tund hai KHirman pe lapak sakta hai

tum ne jis KHun ko maqtal mein dabana chaha

aaj wo kucha o bazar mein aa nikla hai

kahin shoala kahin nara kahin patthar ban kar

KHun chalta hai to rukta nahin sanginon se

sar uThata hai to dabta nahin aainon se

zulm ki baat hi kya zulm ki auqat hi kya

zulm bas zulm hai aaghaz se anjam talak

KHun phir KHun hai sau shakl badal sakta hai

aisi shaklen ki miTao to miTae na bane

aaise shoale ki bujhao to bujhae na bane

aaise nare ki dabao to dabae na bane