darwaze ke pichhe

kal kī baat hai

maiñ ne bhī us darvāze par dastak de dī

pahle to ik fāqoñ maarā kuttā bhauñkā

phir kutte ko DaañT paḌī

ḳhāmosh raho

aur darvāze ke band kivāḌoñ ke pīchhe ik āñchal mahkā

ḳhushbūoñ kī jhiil meñ jaise kisī ne kankar pheñk diyā ho

himmat kar ke maiñ khankārā jaise mujh se kahā gayā thā

khul ga.ī kunDī darvāze kī jaise maiñ ne sun rakkhā thā

bhaḌkīle rangoñ meñ lipTī ek hasīna

pyaar se mujh ko dekh rahī thī

us ke āñchal kī ḳhush-bū

aur us ke chehre kā ġhāza

aur us ke hoñToñ kī surḳhī

aur us kī bāhoñ ke gajre

aur us ke jism kī har zebā.ish pyaar se mujh ko dekh rahī thī

maiñ ne chehre ke pīchhe jo bhuuk chhupā rakkhī thī us ko chhup chhup kar vo dekh rahī thī

itne meñ phir fāqoñ maarā kuttā bhauñkā

phir kutte ko DaañT paḌī

ḳhāmosh raho

ab kuchh hī der meñ apne bhaag bhī jaag uTheñge

ab kuchh der meñ terī bhuuk bhī miT jā.egī

kal ki baat hai

main ne bhi us darwaze par dastak de di

pahle to ek faqon mara kutta bhaunka

phir kutte ko DanT paDi

KHamosh raho

aur darwaze ke band kiwaDon ke pichhe ek aanchal mahka

KHushbuon ki jhil mein jaise kisi ne kankar phenk diya ho

himmat kar ke main khankara jaise mujh se kaha gaya tha

khul gai kunDi darwaze ki jaise main ne sun rakkha tha

bhaDkile rangon mein lipTi ek hasina

pyar se mujh ko dekh rahi thi

us ke aanchal ki KHush-bu

aur us ke chehre ka ghaza

aur us ke honTon ki surKHi

aur us ki bahon ke gajre

aur us ke jism ki har zebaish pyar se mujh ko dekh rahi thi

main ne chehre ke pichhe jo bhuk chhupa rakkhi thi us ko chhup chhup kar wo dekh rahi thi

itne mein phir faqon mara kutta bhaunka

phir kutte ko DanT paDi

KHamosh raho

ab kuchh hi der mein apne bhag bhi jag uThenge

ab kuchh der mein teri bhuk bhi miT jaegi