holi

ek aurat kī zabān se

chal mirī sundar sahelī ham kahīñ chhup jā.eñge

aaj hai holī kā din pītam mire ghar ā.eñge

sāmne jab maiñ na ā.ūñgī bahut ghabrā.eñge

har jagah DhūñDeñge mujh ko DhūñDh kar sharmā.eñge

sāmne aa jā.ūñgī pītam ke ḳhush ho jā.eñge

un meñ maiñ kho jā.ūñgī aur mujh meñ vo kho jā.eñge

mere man ke chheḌne ko mujh se vo baiTheñge duur

maiñ jo uljhūñgī to pītam muskurā.eñge zarūr

uTh rahī hai lahr sī lahrā rahā hai merā man

ho sake to chuum lūñgī aaj pītam ke charan

chhīn kar ākāsh kī godī se taare lā.ūñgī

un ko bhī dāruñgī aur maiñ ḳhud bhī daarī jā.ūñgī

sej phūloñ kī banā.ūñgī maiñ pītam ke liye

barrā se kah do ki ab fursat nahīñ ġham ke liye

aaj pītam ā.eñge aa.egī mere ghar bahār

dekh bigḌā to nahīñ ai aa.ine merā siñghār

uudī uudī badliyoñ se chhan ke girtī hai phuvār

aaj pītam ā.eñge maiñ ho rahī huuñ be-qarār

ban gayā hai zarra zarra mere ghar kā chashm-e-hūr

aaj pītam ā.eñge aa.egā mere ghar meñ nuur

chhiḌ rahī hai rāgnī man kī rabāb-o-chañg se

aaj nahlā.ūñgī pītam ko gulābī rañg se

bhiig jā.eñge to dāman se havā dūñgī unheñ

band kar dūñgī dvāre aaj rokūñgī unheñ

sarv ke saa.e meñ paatī huuñ maiñ pītam kī jhalak

aaj har āvāz meñ suntī huuñ sāġhar kī khanak

pī mire ghar ā.eñge shāyad nahīñ tujh ko ḳhabar

ai papīhe bāvre Topī kahāñ bolā na kar

ek aurat ki zaban se

chal meri sundar saheli hum kahin chhup jaenge

aaj hai holi ka din pitam mere ghar aaenge

samne jab main na aaungi bahut ghabraenge

har jagah DhunDenge mujh ko DhunDh kar sharmaenge

samne aa jaungi pitam ke KHush ho jaenge

un mein main kho jaungi aur mujh mein wo kho jaenge

mere man ke chheDne ko mujh se wo baiThenge dur

main jo uljhungi to pitam muskuraenge zarur

uTh rahi hai lahr si lahra raha hai mera man

ho sake to chum lungi aaj pitam ke charan

chhin kar aakash ki godi se tare laungi

un ko bhi darungi aur main KHud bhi dari jaungi

sej phulon ki banaungi main pitam ke liye

barra se kah do ki ab fursat nahin gham ke liye

aaj pitam aaenge aaegi mere ghar bahaar

dekh bigDa to nahin ai aaine mera singhaar

udi udi badliyon se chhan ke girti hai phuwar

aaj pitam aaenge main ho rahi hun be-qarar

ban gaya hai zarra zarra mere ghar ka chashm-e-hur

aaj pitam aaenge aaega mere ghar mein nur

chhiD rahi hai ragni man ki rabab-o-chang se

aaj nahlaungi pitam ko gulabi rang se

bhig jaenge to daman se hawa dungi unhen

band kar dungi dware aaj rokungi unhen

sarw ke sae mein pati hun main pitam ki jhalak

aaj har aawaz mein sunti hun saghar ki khanak

pi mere ghar aaenge shayad nahin tujh ko KHabar

ai papihe bawre Topi kahan bola na kar