sakal ban phul rahi sarson

kahāñ ho tum bhale ḳhusrau

nizāmuddīn se apne ye jā kahiyo

'araj hamrī suneñ hazrat

jo amvā phūTte the ras bhare piile

vo jaise dhuup ke TukḌe

vo ab yā to nahīñ khilte

yā gir jaate haiñ peḌoñ se

havā kī ek Thokar bhī nahīñ sahte

ye Tesū ke dahakte phuul

jaise zaḳhm haiñ jangal kī shāḳhoñ par

bahār ab sabz pattoñ kī koī taalī nahīñ suntī

jo koyal Daar meñ jaa.e

to us ke sur bhī ghāyal se palaT

aa.eñ samā'at tak

jazīroñ kī havā chīḳhoñ kā nam chehre pe rakhtī hai

yahāñ har Daar par ab Dar kā saaya saath uḌtā hai

visāloñ se ziyāda hijr kī aahaT sune gorī

sañvar saj kar kidhar jaa.e

shikasta aa.ina kyā sūrat-e-dildār dikhlā.e

suno ḳhusrau

basantī mausamoñ meñ tum

koī to rāgnī laao

ki jis ke bol meñ

TuuTe hue mausam bhī juḌ jaa.eñ

zarā khammāj to is pahr meñ chheḌo

jise sun ke judā.ī sukh se so jaa.e

yā phir tum des ke sur chheḌ do

rangrez ban jaa.e to gorī oḌhnī par phir dhanak dekhe

patangoñ kī tarah uḌtī phire

aur phir piyā dil meñ nrit khele

nrit aisā jo marham ho

sakal ban phūltī sarsoñ ko

phir muskān oḌhā.e

bhale ḳhusrau

'araj hamrī zarā pesh-e-nizāmuddīn le jaao

kahan ho tum bhale KHusrau

nizamuddin se apne ye ja kahiyo

'araj hamri sunen hazrat

jo amwa phuTte the ras bhare pile

wo jaise dhup ke TukDe

wo ab ya to nahin khilte

ya gir jate hain peDon se

hawa ki ek Thokar bhi nahin sahte

ye Tesu ke dahakte phul

jaise zaKHm hain jangal ki shaKHon par

bahaar ab sabz patton ki koi tali nahin sunti

jo koyal Dar mein jae

to us ke sur bhi ghayal se palaT

aaen sama'at tak

jaziron ki hawa chiKHon ka nam chehre pe rakhti hai

yahan har Dar par ab Dar ka saya sath uDta hai

visalon se ziyaada hijr ki aahaT sune gori

sanwar saj kar kidhar jae

shikasta aaina kya surat-e-dildar dikhlae

suno KHusrau

basanti mausamon mein tum

koi to ragni lao

ki jis ke bol mein

TuTe hue mausam bhi juD jaen

zara khammaj to is pahr mein chheDo

jise sun ke judai sukh se so jae

ya phir tum des ke sur chheD do

rangrez ban jae to gori oDhni par phir dhanak dekhe

patangon ki tarah uDti phire

aur phir piya dil mein nrit khele

nrit aisa jo marham ho

sakal ban phulti sarson ko

phir muskan oDhae

bhale KHusrau

'araj hamri zara pesh-e-nizamuddin le jao