marg-e-awara

phir vo TuuTā ik sitāra aa ga.ī nāzuk ghaḌī

phir kisī kī be-kasī dāman pasāre hai khaḌī

huuk sī siine meñ uTThī choT sī dil par paḌī

ai ġham-e-dil kyā karūñ ai vahshat-e-dil kyā karūñ

phir huā ham se judā ik shā'ir-e-ḳhāna-ḳharāb

jaise ik shabnam kā qatra jaise dariyā kā hubāb

jaise muflis kī javānī jaise beva kā shabāb

ai ġham-e-dil kyā karūñ ai vahshat-e-dil kyā karūñ

phir dabā sho'la bhaḌak uTThā hai āḳhir kyā karūñ

dil kā paimāna chhalak uTThā hai āḳhir kyā karūñ

zaḳhm siine kā mahak uTThā hai āḳhir kyā karūñ

ai ġham-e-dil kyā karūñ ai vahshat-e-dil kyā karūñ

zulm-e-fitrat ke mazāhir haiñ nazar ke sāmne

ik taraf nādār shā'ir haiñ nazar ke sāmne

saiñkaḌoñ changez o nādir haiñ nazar ke sāmne

ai ġham-e-dil kyā karūñ ai vahshat-e-dil kyā karūñ

jī meñ aatā hai ki saare sāz-o-sāmāñ phūñk duuñ

ye mahal ye 'aish-o-'ishrat ke shabistāñ phūñk duuñ

taḳht-e-sultāñ kyā maiñ saarā qasr-e-sultāñ phūñk duuñ

ai ġham-e-dil kyā karūñ ai vahshat-e-dil kyā karūñ

maiñ agar chāhūñ to phir mushkil hai kyā mere liye

inqilābāt-e-jahāñ ke dar haiñ vā mere liye

par musībat hai mirā 'ahd-e-vafā mere liye

ai ġham-e-dil kyā karūñ ai vahshat-e-dil kyā karūñ

ai dil-e-dard-āshnā saaqī ke maiḳhāne meñ chal

asia ke Keats ke rangīn kāshāne meñ chal

ye nahīñ mumkin to phir ai dost vīrāne meñ chal

ai ġham-e-dil kyā karūñ ai vahshat-e-dil kyā karūñ

zabt ke dāman ko chhoḌūñ ye mirī 'ādat nahīñ

sirf aañsū hī bahā.ūñ ye mirī fitrat nahīñ

aur koī ham-navā mil jaa.e ye qismat nahīñ

ai ġham-e-dil kyā karūñ ai vahshat-e-dil kyā karūñ

aañkh meñ aañsū ke qatre haiñ na chehre par malāl

dil hī dil meñ marg-e-āvāra kā chubhtā hai ḳhayāl

aah lekin kaun jaane kaun samjhe dil kā haal

ai ġham-e-dil kyā karūñ ai vahshat-e-dil kyā karūñ

phir wo TuTa ek sitara aa gai nazuk ghaDi

phir kisi ki be-kasi daman pasare hai khaDi

huk si sine mein uTThi choT si dil par paDi

ai gham-e-dil kya karun ai wahshat-e-dil kya karun

phir hua hum se juda ek sha'ir-e-KHana-KHarab

jaise ek shabnam ka qatra jaise dariya ka hubab

jaise muflis ki jawani jaise bewa ka shabab

ai gham-e-dil kya karun ai wahshat-e-dil kya karun

phir daba sho'la bhaDak uTTha hai aaKHir kya karun

dil ka paimana chhalak uTTha hai aaKHir kya karun

zaKHm sine ka mahak uTTha hai aaKHir kya karun

ai gham-e-dil kya karun ai wahshat-e-dil kya karun

zulm-e-fitrat ke mazahir hain nazar ke samne

ek taraf nadar sha'ir hain nazar ke samne

sainkaDon changez o nadir hain nazar ke samne

ai gham-e-dil kya karun ai wahshat-e-dil kya karun

ji mein aata hai ki sare saz-o-saman phunk dun

ye mahal ye 'aish-o-'ishrat ke shabistan phunk dun

taKHt-e-sultan kya main sara qasr-e-sultan phunk dun

ai gham-e-dil kya karun ai wahshat-e-dil kya karun

main agar chahun to phir mushkil hai kya mere liye

inqilabaat-e-jahan ke dar hain wa mere liye

par musibat hai mera 'ahd-e-wafa mere liye

ai gham-e-dil kya karun ai wahshat-e-dil kya karun

ai dil-e-dard-ashna saqi ke maiKHane mein chal

asia ke Keats ke rangin kashane mein chal

ye nahin mumkin to phir ai dost virane mein chal

ai gham-e-dil kya karun ai wahshat-e-dil kya karun

zabt ke daman ko chhoDun ye meri 'adat nahin

sirf aansu hi bahaun ye meri fitrat nahin

aur koi ham-nawa mil jae ye qismat nahin

ai gham-e-dil kya karun ai wahshat-e-dil kya karun

aankh mein aansu ke qatre hain na chehre par malal

dil hi dil mein marg-e-awara ka chubhta hai KHayal

aah lekin kaun jaane kaun samjhe dil ka haal

ai gham-e-dil kya karun ai wahshat-e-dil kya karun