ek aansu

hazāroñ aañsū jo merī āñkhoñ se gir ke dāman meñ kho gaye haiñ

vo kho ke nāmūs-e-jazb-e-ġham ko Dubo gaye haiñ

na tum ko kuchh paas is fuġhāñ kā

na mujh ko ehsās is ziyāñ kā

magar vo aañsū

vo ek aañsū jo aañkh meñ to nahīñ hai dil meñ chhupā huā hai

rukā huā hai

vo ek aañsū nahīñ hai armāñ hai zindagī kā

vo ek tūfāñ hai āgahī kā

use na chheḌo

use ḳhudā-rā abhī na chheḌo

abhī to nau-ḳhez hai bahut hī tumhārī nafrat kī shād-mānī

jo sach kahūñ to mirī shikastoñ kī dāstāñ hai bahut purānī

tumhāre jaise ka.ī sitam-gar

jo fat.h-o-nusrat ke giit gā kar guzar gaye haiñ

kisī ko kuchh bhī ḳhabar nahīñ hai kidhar gaye haiñ

vo ek nan.hā sā sahmā simTā nahīf aañsū

use na chheḌo

agar vo qatra Dhalak gayā to

agar vo paimāna-e-alam yuuñ chhalak gayā to

na tum rahoge na mere aañsū

hazaron aansu jo meri aankhon se gir ke daman mein kho gaye hain

wo kho ke namus-e-jazb-e-gham ko Dubo gaye hain

na tum ko kuchh pas is fughan ka

na mujh ko ehsas is ziyan ka

magar wo aansu

wo ek aansu jo aankh mein to nahin hai dil mein chhupa hua hai

ruka hua hai

wo ek aansu nahin hai arman hai zindagi ka

wo ek tufan hai aagahi ka

use na chheDo

use KHuda-ra abhi na chheDo

abhi to nau-KHez hai bahut hi tumhaari nafrat ki shad-mani

jo sach kahun to meri shikaston ki dastan hai bahut purani

tumhaare jaise kai sitam-gar

jo fath-o-nusrat ke git ga kar guzar gaye hain

kisi ko kuchh bhi KHabar nahin hai kidhar gaye hain

wo ek nanha sa sahma simTa nahif aansu

use na chheDo

agar wo qatra Dhalak gaya to

agar wo paimana-e-alam yun chhalak gaya to

na tum rahoge na mere aansu