dam-e-tahrir

dam-e-tahrīr

jin nāpāk gandī auratoñ se

kausar-o-tasnīm katrā ke guzreñgī

jin par duudh aur shahd ke pyāle harām kar diye jā.eñge

jin ko malā.ek duzdīda nigāhoñ se bhī dekhnā na chāheñge

jin kā Thikāna jahannam hogā

jinheñ dozaḳh kī aag roz jalā.egī

jin par ġhaiz-o-ġhazab ke koḌe har saa.at barsā.e jā.eñge

un meñ ek maiñ bhī huuñ

mere paañv meñ beḌiyāñ pahnāne

aur mujhe mahbūs-ḳhāne meñ us vaqt tak rakhne kā hukm diyā gayā thā

jab tak ki maiñ apnī sharāratoñ se baaz na aa jā.ūñ

mujhe har roz baal se bārīk rāste par chalnā paḌtā hai

talvār kī dhaar mujhe zaḳhmī kiye detī hai

mere badan par roz na.e aable paḌte haiñ

merī āñkheñ garm salāḳhoñ se dāġhī jaatī haiñ

mujh par roz sang-bārī hotī hai

jinhoñ ne ek dūsre se baat band kar dī

ek dūsre ke saath khānā aur sonā chhoḌ diyā

un kī darāḌeñ bhī gahrī hotī ga.iiñ

mohabbat ko zinā kahne kī rasm bahut purānī hai

aur ahd-o-paimāñ kā bharam qaa.em rakhnā dushvār

jaane kyoñ

jannat kī havā.eñ bilā jhijhak aatī haiñ

aur gunāhgār auratoñ ko chhū kar guzar jaatī haiñ

kuñ.eñ meñ āzūqa pahuñchāne vāloñ kī rassiyāñ chhoTī paḌ ga.ī haiñ

apne pasīne meñ tar roTī kā ik ik luqma

mann-o-salvā se bhī ziyāda ḳhush-zā.eqa hotā jā rahā hai

baa.eñ kañdhe par ye bojh kaisā

aadmī koī hamārā dam-e-tahrīr bhī thā

dam-e-tahrir

jin napak gandi auraton se

kausar-o-tasnim katra ke guzrengi

jin par dudh aur shahd ke pyale haram kar diye jaenge

jin ko malaek duzdida nigahon se bhi dekhna na chahenge

jin ka Thikana jahannam hoga

jinhen dozaKH ki aag roz jalaegi

jin par ghaiz-o-ghazab ke koDe har saat barsae jaenge

un mein ek main bhi hun

mere panw mein beDiyan pahnane

aur mujhe mahbus-KHane mein us waqt tak rakhne ka hukm diya gaya tha

jab tak ki main apni shararaton se baz na aa jaun

mujhe har roz baal se barik raste par chalna paDta hai

talwar ki dhaar mujhe zaKHmi kiye deti hai

mere badan par roz nae aable paDte hain

meri aankhen garm salaKHon se daghi jati hain

mujh par roz sang-bari hoti hai

jinhon ne ek dusre se baat band kar di

ek dusre ke sath khana aur sona chhoD diya

un ki daraDen bhi gahri hoti gain

mohabbat ko zina kahne ki rasm bahut purani hai

aur ahd-o-paiman ka bharam qaem rakhna dushwar

jaane kyon

jannat ki hawaen bila jhijhak aati hain

aur gunahgar auraton ko chhu kar guzar jati hain

kunen mein aazuqa pahunchane walon ki rassiyan chhoTi paD gai hain

apne pasine mein tar roTi ka ek ek luqma

mann-o-salwa se bhi ziyaada KHush-zaeqa hota ja raha hai

baen kandhe par ye bojh kaisa

aadmi koi hamara dam-e-tahrir bhi tha