aaKHiri din ki talash

ḳhudā ne qur.ān meñ kahā hai

ki logo maiñ ne

tumhārī ḳhātir

falak banāyā

falak ko tāroñ se

chāñd sūraj se jagmagāyā

ki logo maiñ ne

tumhārī ḳhātir

zamīñ banā.ī

zamīñ ke siine pe

nadiyoñ kī lakīreñ khīñchīñ

samundaroñ ko

zamīñ kī āġhosh meñ biThāyā

pahāḌ rakkhe

daraḳht ugaa.e

daraḳht pe

phuul phal lagā.e

ki logo maiñ ne

tumhārī ḳhātir

ye din banāyā

ki din meñ kuchh kaam kar sako tum

ki logo maiñ ne

tumhārī ḳhātir

ye shab banā.ī

ki shab meñ ārām kar sako tum

ki logo maiñ ne

tumhārī ḳhātir

ye sab banāyā

magar na bhūlo

ki ek din maiñ

ye saarī chīzeñ sameT lūñgā

ḳhudā ne jo kuchh kahā hai

sach hai

magar na jaane

vo din kahāñ hai

vo āḳhirī din

ki jab ḳhudā ye tamām chīzeñ sameT legā

mujhe usī din kī justujū hai

ki ab ye chīzeñ

bahut purānī

bahut hī farsūda ho chukī haiñ

KHuda ne quran mein kaha hai

ki logo main ne

tumhaari KHatir

falak banaya

falak ko taron se

chand suraj se jagmagaya

ki logo main ne

tumhaari KHatir

zamin banai

zamin ke sine pe

nadiyon ki lakiren khinchin

samundaron ko

zamin ki aaghosh mein biThaya

pahaD rakkhe

daraKHt ugae

daraKHt pe

phul phal lagae

ki logo main ne

tumhaari KHatir

ye din banaya

ki din mein kuchh kaam kar sako tum

ki logo main ne

tumhaari KHatir

ye shab banai

ki shab mein aaram kar sako tum

ki logo main ne

tumhaari KHatir

ye sab banaya

magar na bhulo

ki ek din main

ye sari chizen sameT lunga

KHuda ne jo kuchh kaha hai

sach hai

magar na jaane

wo din kahan hai

wo aaKHiri din

ki jab KHuda ye tamam chizen sameT lega

mujhe usi din ki justuju hai

ki ab ye chizen

bahut purani

bahut hi farsuda ho chuki hain