heart-attack

dard itnā thā ki us raat dil-e-vahshī ne

har rag-e-jāñ se ulajhnā chāhā

har bun-e-mū se Tapaknā chāhā

aur kahīñ duur tire sahn meñ goyā

pattā pattā mire afsurda lahū meñ dhul kar

husn-e-mahtāb se āzurda nazar aane lagā

mere vīrāna-e-tan meñ goyā

saare dukhte hue reshoñ kī tanābeñ khul kar

silsila-vār patā dene lagīñ

ruḳhsat-e-qāfila-e-shauq kī tayyārī kā

aur jab yaad kī bujhtī huī sham.oñ meñ nazar aayā kahīñ

ek pal āḳhirī lamha tirī dildārī kā

dard itnā thā ki us se bhī guzarnā chāhā

ham ne chāhā bhī magar dil na Thaharnā chāhā

dard itna tha ki us raat dil-e-wahshi ne

har rag-e-jaan se ulajhna chaha

har bun-e-mu se Tapakna chaha

aur kahin dur tere sahn mein goya

patta patta mere afsurda lahu mein dhul kar

husn-e-mahtab se aazurda nazar aane laga

mere virana-e-tan mein goya

sare dukhte hue reshon ki tanaben khul kar

silsila-war pata dene lagin

ruKHsat-e-qafila-e-shauq ki tayyari ka

aur jab yaad ki bujhti hui shamon mein nazar aaya kahin

ek pal aaKHiri lamha teri dildari ka

dard itna tha ki us se bhi guzarna chaha

hum ne chaha bhi magar dil na Thaharna chaha