watan-ashob

sabza o barg o laala o sarv-o-saman ko kyā huā

saarā chaman udaas hai haa.e chaman ko kyā huā

ik sukūt har taraf hosh-rubā o haul-nāk

ḳhuld-e-vatan ke pāsbāñ ḳhuld-e-vatan ko kyā huā

raqs-e-tarab kidhar gayā naġhma-tarāz kyā hue

ġhamza-o-nāz kyā hue ishva o fan ko kyā huā

jis kī nava-e-dil-sitāñ zaḳhma-e-sāz-e-shauq thī

koī batāo us but-e-ġhuncha-dahan ko kyā huā

chashmak-e-dam-ba-dam nahīñ mashq-e-ḳhirām-o-ram nahīñ

mere ġhazāl kyā hue mere ḳhutan ko kyā huā

chhā.ī hai kyuuñ fasurdagī ālam-e-husn-o-ishq par

aaj vo ''nal'' kidhar ga.e aaj ''daman'' ko kyā huā

āñkhoñ meñ ḳhauf o yaas hai chehra udaas udaas hai

asr-e-ravāñ kī lailā-e-burqa-fagan ko kyā huā

aah ḳhirad kidhar ga.ī aah junūñ ne kyā kiyā

aah shabāb-e-ḳhūgar-dār-o-rasan ko kyā huā

koī batā.e azmat-e-ḳhāk-e-vatan kahāñ hai ab

koī batā.e ġhairat-e-ahl-e-vatan ko kyā huā

koh vahī daman vahī dasht vahī chaman vahī

phir ye 'majāz' jazba-e-hubb-e-vatan ko kyā huā

sabza o barg o lala o sarw-o-saman ko kya hua

sara chaman udas hai hae chaman ko kya hua

ek sukut har taraf hosh-ruba o haul-nak

KHuld-e-watan ke pasban KHuld-e-watan ko kya hua

raqs-e-tarab kidhar gaya naghma-taraaz kya hue

ghamza-o-naz kya hue ishwa o fan ko kya hua

jis ki nawa-e-dil-sitan zaKHma-e-saz-e-shauq thi

koi batao us but-e-ghuncha-dahan ko kya hua

chashmak-e-dam-ba-dam nahin mashq-e-KHiram-o-ram nahin

mere ghazal kya hue mere KHutan ko kya hua

chhai hai kyun fasurdagi aalam-e-husn-o-ishq par

aaj wo nal kidhar gae aaj daman ko kya hua

aankhon mein KHauf o yas hai chehra udas udas hai

asr-e-rawan ki laila-e-burqa-fagan ko kya hua

aah KHirad kidhar gai aah junun ne kya kiya

aah shabab-e-KHugar-dar-o-rasan ko kya hua

koi batae azmat-e-KHak-e-watan kahan hai ab

koi batae ghairat-e-ahl-e-watan ko kya hua

koh wahi daman wahi dasht wahi chaman wahi

phir ye 'majaz' jazba-e-hubb-e-watan ko kya hua