meri pahchan

maiñ samajhtā thā ki tanhā huuñ maiñ

aur is dasht-e-pur-āshob meñ merī hastī

ek vīrāna hai be-āb-o-giyāh

phuul khilte haiñ na aatī hai bahār

lekin is hai.at-e-be-rang ko

tasvīr-e-ḳhizāñ bhī to nahīñ keh sakte

merī tanhā.ī kī pariyoñ kā nasheman hai yahī

har parī aa ke lubhātī hai mujhe

duur bhī rahtī hai nazdīk bhī aa jaatī hai

aur dulhan ban ke mujhe kartī hai sar-mast-e-nashāt

dekhte dekhte hī

suunā aasan mirī tanhā.ī kā ban jaatā hai gul-zār-e-ḳhayāl

lekin ik baar jo vaqt

aa ke de jaatā hai dastak dil par

chāh-e-tanhā.ī meñ ho jaatā huuñ fil-faur asiir

phir vahī garm havā phir vahī sahrā-e-muhīb

bas ye pahchān hai merī

ki nikaltā huuñ kabhī ḳhol se bāhar

kabhī chhup jaatā huuñ

main samajhta tha ki tanha hun main

aur is dasht-e-pur-ashob mein meri hasti

ek virana hai be-ab-o-giyah

phul khilte hain na aati hai bahaar

lekin is haiat-e-be-rang ko

taswir-e-KHizan bhi to nahin keh sakte

meri tanhai ki pariyon ka nasheman hai yahi

har pari aa ke lubhati hai mujhe

dur bhi rahti hai nazdik bhi aa jati hai

aur dulhan ban ke mujhe karti hai sar-mast-e-nashat

dekhte dekhte hi

suna aasan meri tanhai ka ban jata hai gul-zar-e-KHayal

lekin ek bar jo waqt

aa ke de jata hai dastak dil par

chah-e-tanhai mein ho jata hun fil-faur asir

phir wahi garm hawa phir wahi sahra-e-muhib

bas ye pahchan hai meri

ki nikalta hun kabhi KHol se bahar

kabhi chhup jata hun