hawa chor hai

mire baal saare havā ne uḌaa.e

kabhī merā saarā badan gudgudā.e

havā chor hai kitnī muñh-zor hai

kabhī khiḌkiyāñ khaTkhaTātī huī

kabhī mere dar ko bajātī huī

kabhī ik ghaTā saath ghanghor hai

ḳhudā ne diyā garche qalb-e-salīm

zarā dekhiye rang-e-bād-e-nasīm

mujhe khīñchtī aaj kis or hai

bahut be-kalī hai yahāñ har Dagar

havā dasht se laa.ī hai ik ḳhabar

sunā hai ki raqsāñ koī mor hai

havā-e-fazā aur havā-e-nafas

mire chār-sū hai hisār-e-qafas

azal se ye nā-chīz kamzor hai

havā ko bhalā dosh deñ kab talak

bahut hā-o-hū ham kareñ kab talak

ye bāhar nahīñ dāḳhlī shor hai

havā kī maiñ kahtā kahānī tamām

agarche huī ye javānī tamām

magar mere dil meñ chhupā chor hai

ḳhudā quvvat-e-nutq detā agar

havā kahtī ai mālik-e-bahr-o-bar

mujhe jaañ se pyārā ye bhambhor hai

mere baal sare hawa ne uDae

kabhi mera sara badan gudgudae

hawa chor hai kitni munh-zor hai

kabhi khiDkiyan khaTkhaTati hui

kabhi mere dar ko bajati hui

kabhi ek ghaTa sath ghanghor hai

KHuda ne diya garche qalb-e-salim

zara dekhiye rang-e-baad-e-nasim

mujhe khinchti aaj kis or hai

bahut be-kali hai yahan har Dagar

hawa dasht se lai hai ek KHabar

suna hai ki raqsan koi mor hai

hawa-e-faza aur hawa-e-nafas

mere chaar-su hai hisar-e-qafas

azal se ye na-chiz kamzor hai

hawa ko bhala dosh den kab talak

bahut ha-o-hu hum karen kab talak

ye bahar nahin daKHli shor hai

hawa ki main kahta kahani tamam

agarche hui ye jawani tamam

magar mere dil mein chhupa chor hai

KHuda quwwat-e-nutq deta agar

hawa kahti ai malik-e-bahr-o-bar

mujhe jaan se pyara ye bhambhor hai