mudawa

baaġh ke ujḌe hue goshe meñ tanhā ek peḌ

yuuñ sarāsīma khaḌā hai soch ke jangal meñ gum

jaise aa nikle koī bhaTkā musāfir ajnabī se des meñ

aur us be-ḳhānumāñ kā ham-zabāñ koī na ho

sochtā hai kis tarah kāTūñgā tanhā.ī kī raat

raat hai itnī bhayānak itnī talḳh itnī tavīl

naag ban kar Das rahā hai jis kā har lamha ise

kāñptā hai ḳhauf se ye bed-e-majnūñ kī tarah

muskurā kar apne ham-jinsoñ se gar ye jā mile

apnī is gambhīr ḳhāmoshī kā afsūñ toḌ de

raat kaT saktī hai chhaT saktā hai ye abr-e-siyah

is kī kulfat kā mudāvā

muskurāne meñ hai

rone meñ nahīñ

bagh ke ujDe hue goshe mein tanha ek peD

yun sarasima khaDa hai soch ke jangal mein gum

jaise aa nikle koi bhaTka musafir ajnabi se des mein

aur us be-KHanuman ka ham-zaban koi na ho

sochta hai kis tarah kaTunga tanhai ki raat

raat hai itni bhayanak itni talKH itni tawil

nag ban kar Das raha hai jis ka har lamha ise

kanpta hai KHauf se ye bed-e-majnun ki tarah

muskura kar apne ham-jinson se gar ye ja mile

apni is gambhir KHamoshi ka afsun toD de

raat kaT sakti hai chhaT sakta hai ye abr-e-siyah

is ki kulfat ka mudawa

muskurane mein hai

rone mein nahin