ye urdu meri shan hai

ye urdu mirī shaan hai

ye urdu mirī jaan hai

ye 'ġhālib' kī ġhazloñ kī raanī banī hai

ye qissa banī hai kahānī banī hai

ki 'hālī' ne is ko sajāyā sañvārā

to 'iqbāl' ne har tarah se nikhārā

ye amn kā armān hai

kabhī is ko apnā banā kar to dekho

ki lafzoñ meñ apne sajā kar to dekho

yahī guftugū ko sharaf baḳhsh degī

latāfat hamesha zabāñ meñ rahegī

bahut pyārī āsān hai

kisī qaum ke saath joḌā na jaa.e

ise haath meñ le ke chhoḌā na jaa.e

karo is se ulfat ki jaise ye maañ hai

yahī hindavī hai jo urdu zabāñ hai

ye kyā koī mehmān hai

sabhī ko mohabbat sikhā dī hai is ne

jahāñ baat bigḌī banā dī hai is ne

zabāñ jo hai tahzīb kā ik havāla

zabāñ reḳhta hai magar sab se aa'lā

yahī sab kī pahchān hai

batā.eñ tumheñ kyā hai urdu kī vus'at

hai saare jahāñ meñ isī kī hukūmat

ye āb-e-hayāt aisā hai kyā kaheñ ham

ki urdu hī boleñ to zinda raheñ ham

du'ā hai ye vardān hai

ye urdu meri shan hai

ye urdu meri jaan hai

ye 'ghaalib' ki ghazlon ki rani bani hai

ye qissa bani hai kahani bani hai

ki 'haali' ne is ko sajaya sanwara

to 'iqbaal' ne har tarah se nikhaara

ye amn ka arman hai

kabhi is ko apna bana kar to dekho

ki lafzon mein apne saja kar to dekho

yahi guftugu ko sharaf baKHsh degi

latafat hamesha zaban mein rahegi

bahut pyari aasan hai

kisi qaum ke sath joDa na jae

ise hath mein le ke chhoDa na jae

karo is se ulfat ki jaise ye man hai

yahi hindawi hai jo urdu zaban hai

ye kya koi mehman hai

sabhi ko mohabbat sikha di hai is ne

jahan baat bigDi bana di hai is ne

zaban jo hai tahzib ka ek hawala

zaban reKHta hai magar sab se aa'la

yahi sab ki pahchan hai

bataen tumhein kya hai urdu ki wus'at

hai sare jahan mein isi ki hukumat

ye aab-e-hayat aisa hai kya kahen hum

ki urdu hi bolen to zinda rahen hum

du'a hai ye wardan hai