chand

vo niile āsmān par safed halqa

jise sab chāñd kahte haiñ

jise hind-o-pāk ke bachche maamā samajhte haiñ salām karte haiñ

jise sho.arā

hasīn chehroñ se ta.abīr karte haiñ

vo niile āsmān par safed halqa

chamaktā hai jo ghaTtā baḌhtā bhī hai

ḳhalā kī muñDeroñ pe chaltā bhī hai

ḳhayāl-e-mahbūb se

shab-e-tanhā.ī ko jagmagātā bhī hai āñsūoñ meñ jhilmilātā bhī hai

vo niile āsmān par safed halqa

ziyā jis kī yādoñ kā darpan dikhātī rahī

javāñ dil kī dhaḌkan jagātī rahī

ḳhayāloñ meñ

kisī ko bulātī rahī jazbāt gudgudātī rahī

vo niile āsmān par safed halqa

talāsh meñ jis kī ghire

butoñ kī tarah be-kahe be-sune

hayāt-o-maut se be-ḳhabar

hazāroñ sciencedāñ us pe jaane ko koshāñ rahe

vo niile āsmān par safed halqa

dikhā.ī dene ke bāvajūd bhī jo sab kā

bas ik ḳhayāl thā tasavvur thā

achānak ek din

usī insāñ ke qadmoñ ke nīche aa gayā

vo niile āsmān par safed halqa

na jis par koī zindagī hai

na husn-e-fitrat kī ridā yā oḌhnī hai

jahāñ sirf ḳhāmushī hai

vo niile āsmān par safed halqa

haqīqat jis kī sab samajh meñ aa ga.ī phir bhī

kisī shā.ir ne kyoñ apne mahbūb kī us se misāl dī

nazar meñ us kī vo hasīñ bhī kyā chāñd jaisā hai jahāñ kuchh bhī nahīñ

jahāñ hai bas chand lamhoñ kī chāñdnī

wo nile aasman par safed halqa

jise sab chand kahte hain

jise hind-o-pak ke bachche mama samajhte hain salam karte hain

jise shoara

hasin chehron se tabir karte hain

wo nile aasman par safed halqa

chamakta hai jo ghaTta baDhta bhi hai

KHala ki munDeron pe chalta bhi hai

KHayal-e-mahbub se

shab-e-tanhai ko jagmagata bhi hai aansuon mein jhilmilata bhi hai

wo nile aasman par safed halqa

ziya jis ki yaadon ka darpan dikhati rahi

jawan dil ki dhaDkan jagati rahi

KHayalon mein

kisi ko bulati rahi jazbaat gudgudati rahi

wo nile aasman par safed halqa

talash mein jis ki ghire

buton ki tarah be-kahe be-sune

hayat-o-maut se be-KHabar

hazaron sciencedan us pe jaane ko koshan rahe

wo nile aasman par safed halqa

dikhai dene ke bawajud bhi jo sab ka

bas ek KHayal tha tasawwur tha

achanak ek din

usi insan ke qadmon ke niche aa gaya

wo nile aasman par safed halqa

na jis par koi zindagi hai

na husn-e-fitrat ki rida ya oDhni hai

jahan sirf KHamushi hai

wo nile aasman par safed halqa

haqiqat jis ki sab samajh mein aa gai phir bhi

kisi shair ne kyon apne mahbub ki us se misal di

nazar mein us ki wo hasin bhi kya chand jaisa hai jahan kuchh bhi nahin

jahan hai bas chand lamhon ki chandni