bakira

....aur chādar par shab-bāshī kā zinda lahū thā

us ne uTh ke añgḌā.ī lī

ā.īne meñ chehra dekhā

sarshārī meñ itmīnān kī ThanDī saañs lī

us kī thakī huī āñkhoñ meñ

dīvānī maġhrūr chamak thī

fat.h ke nashshe se palkeñ bojhal thiiñ

us ne sochā hide-park meñ

jo laḌkī ik jāsūsī novel meñ Duubī

use milī thī

vo to jaise fāḳhta niklī

us ne apnī sex appeal kā kampā maar ke

raam kiyā thā

us kī lachchhe-dār anokhī bāteñ sun kar

us ke saath chalī aa.ī thī

sub.h-savere

chaa.e banā kar

bosa de kar

chalī ga.ī thī

vo to sach-much bākara niklī

(varna sola sattarah baras kī laḌkī harrafa hotī hai)

us ne sochā

us ne shab bhar

band kalī par

ik zañbūrī raqs kiyā thā

aur chādar par itnā lahū thā

jaise jañg-e-azīm

isī bistar par laḌī ga.ī thī

us ne apnī moñchhoñ ke guchchhe meñ

apnī hañsī dabā.ī

ek ḳhayāl se

āñkhoñ meñ saaya lahrāyā

sar chakrāyā....

ye to us kī mahvārī kā murda lahū thā

jo chādar par phail gayā thā

aur chadar par shab-bashi ka zinda lahu tha

us ne uTh ke angDai li

aaine mein chehra dekha

sarshaari mein itminan ki ThanDi sans li

us ki thaki hui aankhon mein

diwani maghrur chamak thi

fath ke nashshe se palken bojhal thin

us ne socha hide-park mein

jo laDki ek jasusi nowel mein Dubi

use mili thi

wo to jaise faKHta nikli

us ne apni sex appeal ka kampa mar ke

ram kiya tha

us ki lachchhe-dar anokhi baaten sun kar

us ke sath chali aai thi

subh-sawere

chae bana kar

bosa de kar

chali gai thi

wo to sach-much bakara nikli

(warna sola sattarah baras ki laDki harrafa hoti hai)

us ne socha

us ne shab bhar

band kali par

ek zanburi raqs kiya tha

aur chadar par itna lahu tha

jaise jang-e-azim

isi bistar par laDi gai thi

us ne apni monchhon ke guchchhe mein

apni hansi dabai

ek KHayal se

aankhon mein saya lahraya

sar chakraya

ye to us ki mahwari ka murda lahu tha

jo chadar par phail gaya tha