basant ki aamad

phir nazar aatī hai sabze kī fazā meñ duur tak

aur ḳhushbū se mahaktī haiñ havā.eñ duur tak

jaatī haiñ qumrī-o-bulbul kī sadā.eñ duur tak

nīche uupar aage pīchhe dā.eñ-bā.eñ duur tak

haiñ tarannum-rez yaksar shāḳh-o-barg-o-bār aaj

ban gayā hai resha resha tār-e-mausīqār aaj

gulshanoñ meñ haiñ urūsān-e-bahār ārāsta

gulban-o-naḳhl-o-nihāl-o-shāḳhsār ārāsta

sabza-e-gul se haiñ dasht-o-kohsār ārāsta

ho gayā saarā jahāñ ā.īna-dār ārāsta

har lab-e-jū par haiñ yuuñ sarv-e-ḳhirāmāñ saiñkaḌoñ

goyā shīshe meñ utar aa.ī haiñ pariyāñ saiñkaḌoñ

dahr se ma.adūm jaaḌe ke nishāñ hone lage

har taraf āsār-e-sar-garmī ayaañ hone lage

jāda-paimā.ī manāzil kā ravāñ hone lage

munjamid dariyāoñ ke paanī ravāñ hone lage

pattharoñ meñ josh-e-tāsīr-e-numū paidā huā

har rag-e-afsurda meñ taaza lahū paidā huā

ai vafā khulte haiñ tujh par aaj kyā kyā raaz dekh

chal chaman meñ bulbul-o-gul ke niyāz-o-nāz dekh

jumbish-e-mauj-e-nasīm-e-sub.h kā e.ajāz dekh

tā.ir-e-be-bāl-o-par kī hasrat-e-parvāz dekh

chhoḌ ġhaflat aur mahv-e-garm-joshī tū bhī ho

arsa-e-hastī meñ garm-e-tāza-koshī tū bhī ho

phir nazar aati hai sabze ki faza mein dur tak

aur KHushbu se mahakti hain hawaen dur tak

jati hain qumri-o-bulbul ki sadaen dur tak

niche upar aage pichhe daen-baen dur tak

hain tarannum-rez yaksar shaKH-o-barg-o-bar aaj

ban gaya hai resha resha tar-e-mausiqar aaj

gulshanon mein hain urusan-e-bahaar aarasta

gulban-o-naKHl-o-nihaal-o-shaKHsar aarasta

sabza-e-gul se hain dasht-o-kohsar aarasta

ho gaya sara jahan aaina-dar aarasta

har lab-e-ju par hain yun sarw-e-KHiraman sainkaDon

goya shishe mein utar aai hain pariyan sainkaDon

dahr se madum jaDe ke nishan hone lage

har taraf aasar-e-sar-garmi ayan hone lage

jada-paimai manazil ka rawan hone lage

munjamid dariyaon ke pani rawan hone lage

pattharon mein josh-e-tasir-e-numu paida hua

har rag-e-afsurda mein taza lahu paida hua

ai wafa khulte hain tujh par aaj kya kya raaz dekh

chal chaman mein bulbul-o-gul ke niyaz-o-naz dekh

jumbish-e-mauj-e-nasim-e-subh ka eajaz dekh

tair-e-be-baal-o-par ki hasrat-e-parwaz dekh

chhoD ghaflat aur mahw-e-garm-joshi tu bhi ho

arsa-e-hasti mein garm-e-taza-koshi tu bhi ho