laDkiyo aao aao mere waste chuDiyan le ke aao

laḌkiyo aao aao mire vāste chūḌiyāñ le ke aao

ki merī ragoñ meñ lahū kī dhanak bujh rahī hai

maiñ 'umroñ se nāmard lafzoñ ke pahlū meñ leTā huuñ

aur merī āñkhoñ kā nam mar chukā hai

shikasta muñDeroñ pe maiñ ne sunā hai

tumhārī chamakdār āñkhoñ kī lau se charāġhāñ huā hai

sunā hai ki mahkūm shahroñ meñ āñchal kā parcham khulā hai

jahāñ par lahū kī 'ibārat se tum ne nayā din likhā hai

magar merī āñkhoñ kā nam mar chukā hai

mire vāste chūḌiyāñ le ke aao

laḌkiyo aao aao

unhoñ ne mire bhā.iyoñ ke liye 'umr kī qaid rakkhī hai

bahnoñ ko marmar kī qabroñ meñ

maaoñ ko bārūd kī sansanātī surangoñ meñ

bachchoñ ko taaza havā band Dibboñ meñ mahfūz kar ke

jahāzoñ meñ bhejā hai

aao mire jism kī sarhadoñ par

lahū kī 'ibārat meñ sūraj kī tā'bīr likkho

ragoñ kī añdherī siyah suunī galiyoñ meñ

āñchal kā dar khol do aao aao

mirī zang-ālūd āñkhoñ meñ pahlī kiran ban ke aao

mire vāste chūḌiyāñ le ke aao

ki merī ragoñ meñ lahū kī dhanak bujh rahī hai

maiñ 'umroñ se nāmard lafzoñ ke pahlū meñ leTā huuñ

aur merī āñkhoñ kā nam mar chukā hai

laDkiyo aao aao mere waste chuDiyan le ke aao

ki meri ragon mein lahu ki dhanak bujh rahi hai

main 'umron se namard lafzon ke pahlu mein leTa hun

aur meri aankhon ka nam mar chuka hai

shikasta munDeron pe main ne suna hai

tumhaari chamakdar aankhon ki lau se charaghan hua hai

suna hai ki mahkum shahron mein aanchal ka parcham khula hai

jahan par lahu ki 'ibarat se tum ne naya din likha hai

magar meri aankhon ka nam mar chuka hai

mere waste chuDiyan le ke aao

laDkiyo aao aao

unhon ne mere bhaiyon ke liye 'umr ki qaid rakkhi hai

bahnon ko marmar ki qabron mein

maon ko barud ki sansanati surangon mein

bachchon ko taza hawa band Dibbon mein mahfuz kar ke

jahazon mein bheja hai

aao mere jism ki sarhadon par

lahu ki 'ibarat mein suraj ki ta'bir likkho

ragon ki andheri siyah suni galiyon mein

aanchal ka dar khol do aao aao

meri zang-alud aankhon mein pahli kiran ban ke aao

mere waste chuDiyan le ke aao

ki meri ragon mein lahu ki dhanak bujh rahi hai

main 'umron se namard lafzon ke pahlu mein leTa hun

aur meri aankhon ka nam mar chuka hai