aurat

tābish-e-ḳhurshīd nūr-e-māh paanī kī jhalak

ḳhanda-e-qulqul sadā koyal kī ġhunchoñ kī chaTak

larzish-e-sīmāb bijlī kī taḌap shāḳhoñ kā loch

aql kī tezī tabī.at kī upach shā.ir kā soch

iztirāb-e-mauj kāñToñ kī ḳhalish nāgan ke bal

tiir kī sur.at kamāñ kā ijz shamshīroñ ke phal

aab motī kī chamak kundan kī hiire kī damak

ashrafī kā ruup Taksālī mahāsil kī khanak

dāman-e-kohsār ke manzar nava-e-ābshār

shor-e-dariyā karvaTeñ lahroñ kī sāhil kā qarār

zamzame kā itr kaif-e-naġhma lai kī puḳhtagī

shorish-e-mai, laġhzish-e-mai-nosh, josh-e-be-ḳhudī

āhu-e-ram-ḳhurda kī vahshat ḳharāre teziyāñ

gaa.e kī sanjīdgī jugnū kī ātish-reziyāñ

vādī-e-kashmīr kī nuzhat guloñ kā rañg-o-bū

sarv kā qad kabk kī raftār qamrī kā gulū

zulmat-e-shām-e-avadh sub.h-e-banaras kā nikhār

aagre ke taaj kī azmat himāla kā vaqār

somnātī rif.ateñ bhārat kī tahzīb-e-qadīm

pāTlī-putra kī shohrat magdh kī shān-e-azīm

dil-pazīrī-e-azāñ dildārī-e-nāqūs-e-dair

sehan-e-masjid kā taqaddus partav-e-fānūs-e-dair

''harbhajan'' kā faiz husn-e-e'tiqād-e-barhaman

kumbh ke mele kī zīnat vaq.at-e-gañg-o-jaman

barbat o chañg o surūd o arġhanūñ ke zer-o-bam

dil-kashī pardoñ kī āvāzoñ ke jaadū taal sam

talḳhi-e-anjām jab sab koshisheñ nākām hoñ

ḳhushnumā seboñ kī halkī turshiyāñ jab ḳhaam hoñ

dekh kar ye iqtibās-e-kār-gāh-e-ins-o-jāñ

kār-pardāzān-e-qudarat meñ huiiñ sargoshiyāñ

ek bolā imtizāj un kā qayāmat saaz hai

dūsrā kahne lagā ḳhāmosh koī raaz hai

ye anāsir ek muddat tak rahe garm-e-amal

āḳhirī tahrīk-e-ismat se hue aapas meñ hal

sub.h-dam jab gosha gosha matla-e-anvār thā

zarra zarra ālam-e-nairañg kā sarshār thā

is murkkab ko usūlī juñbisheñ hone lagīñ

ye hayūlā irtiqā.ī manzileñ tai kar gayā

shah-par-e-parvāz iffat se bulandī par gayā

e'tidāl-e-unsurī par pā liyā jab iqtidār

ain-fitrat ke mutābiq shakl kī ik iḳhtiyār

aa.ī a.azā meñ gudāzī aur garmī jism meñ

aa.ī ruḳhsāroñ pe surḳhī aur narmī jism meñ

pāya-e-takmīl ko pahuñchā jūñhī ye shāhkār

dast-e-qudrat ne TaTolī nabz us kī baar baar

bistar-e-nik.hat pe ye putlī jo mahv-e-ḳhvāb thī

mast añgḌā.ī ke hāthoñ jaag uThī sharmā ga.ī

dekh kar shā.ir ne us ko nukta-e-hikmat kahā

aur be-soche zamāne ne use ''aurat'' kahā

tabish-e-KHurshid nur-e-mah pani ki jhalak

KHanda-e-qulqul sada koyal ki ghunchon ki chaTak

larzish-e-simab bijli ki taDap shaKHon ka loch

aql ki tezi tabiat ki upach shair ka soch

iztirab-e-mauj kanTon ki KHalish nagan ke bal

tir ki surat kaman ka ijz shamshiron ke phal

aab moti ki chamak kundan ki hire ki damak

ashrafi ka rup Taksali mahasil ki khanak

daman-e-kohsar ke manzar nawa-e-abshaar

shor-e-dariya karwaTen lahron ki sahil ka qarar

zamzame ka itr kaif-e-naghma lai ki puKHtagi

shorish-e-mai, laghzish-e-mai-nosh, josh-e-be-KHudi

aahu-e-ram-KHurda ki wahshat KHarare teziyan

gae ki sanjidgi jugnu ki aatish-reziyan

wadi-e-kashmir ki nuzhat gulon ka rang-o-bu

sarw ka qad kabk ki raftar qamri ka gulu

zulmat-e-sham-e-awadh subh-e-banaras ka nikhaar

aagre ke taj ki azmat himala ka waqar

somnati rifaten bhaarat ki tahzib-e-qadim

paTli-putra ki shohrat magdh ki shan-e-azim

dil-paziri-e-azan dildari-e-naqus-e-dair

sehan-e-masjid ka taqaddus partaw-e-fanus-e-dair

harbhajan ka faiz husn-e-e'tiqad-e-barhaman

kumbh ke mele ki zinat waqat-e-gang-o-jaman

barbat o chang o surud o arghanun ke zer-o-bam

dil-kashi pardon ki aawazon ke jadu tal sam

talKHi-e-anjam jab sab koshishen nakaam hon

KHushnuma sebon ki halki turshiyan jab KHam hon

dekh kar ye iqtibas-e-kar-gah-e-ins-o-jaan

kar-pardazan-e-qudarat mein huin sargoshiyan

ek bola imtizaj un ka qayamat saz hai

dusra kahne laga KHamosh koi raaz hai

ye anasir ek muddat tak rahe garm-e-amal

aaKHiri tahrik-e-ismat se hue aapas mein hal

subh-dam jab gosha gosha matla-e-anwar tha

zarra zarra aalam-e-nairang ka sarshaar tha

is murkkab ko usuli junbishen hone lagin

ye hayula irtiqai manzilen tai kar gaya

shah-par-e-parwaz iffat se bulandi par gaya

e'tidal-e-unsuri par pa liya jab iqtidar

ain-fitrat ke mutabiq shakl ki ek iKHtiyar

aai aaza mein gudazi aur garmi jism mein

aai ruKHsaron pe surKHi aur narmi jism mein

paya-e-takmil ko pahuncha junhi ye shahkar

dast-e-qudrat ne TaToli nabz us ki bar bar

bistar-e-nikhat pe ye putli jo mahw-e-KHwab thi

mast angDai ke hathon jag uThi sharma gai

dekh kar shair ne us ko nukta-e-hikmat kaha

aur be-soche zamane ne use aurat kaha