aurat

tū prem mandir kī paak devī tū husn kī mamlikat kī raanī

hayāt-e-insāñ kī qismatoñ par tirī nigāhoñ kī hukmarānī

jahān-e-ulfat tirī qalam-rau harīm-e-dil terī rājdhānī

bahār-e-fitrat tire lab-e-lāl-gūñ kī doshīza muskurāhaT

nizām-e-kaunain terī āñkhoñ ke surḳh Doroñ kī thartharāhaT

faroġh-e-sad-kā.enāt terī jabīn sīmīñ kī zau-fishānī

bhaḌakte sīnoñ meñ bas rahī haiñ qarār ban kar tirī adā.eñ

tarastī rūhoñ ko jām-e-ishrat pilā rahī haiñ tirī vafā.eñ

rag-e-jahāñ meñ thirak rahī hai sharāb ban kar tirī javānī

dimāġh-e-parvar-digār meñ jo azal ke din se machal rahā thā

zabān-e-taḳhlīq-e-dahr se bhī na jis kā iz.hār ho sakā thā

numūd terī usī muqaddas hasīñ taḳhayyul kī tarjumānī

hai vādi-e-nīl par tirā abr-e-zulf sāya-kunāñ abhī tak

haiñ jām-e-īrāñ kī mai meñ tere laboñ kī shīrīniyāñ abhī tak

fasāna-go hai tirī abhī tak hadīs-e-yūnāñ kī ḳhūñ-chakānī'

hai terī ulfat ke raag par mauj-e-rūd-e-gañgā ko vajd ab tak

tirī mohabbat kī aag meñ jal rahā hai sahrā-e-najd ab tak

jamāl-e-zahra tire malā.ek fareb jalvoñ kī ik nishānī

tirī nigāhoñ ke sahar se gul-fishāñ hai sher o adab kī duniyā

tire tabassum ke kaif se hai ye ġham kī duniyā tarab kī duniyā

tire laboñ kī miThās se shakkarīñ hai zahrāb-e-zindagānī

tirā tabassum kalī kalī meñ tirā tarannum chaman chaman meñ

rumūz-e-hastī ke pech-o-ḳham tere gesuoñ kī shikan shikan meñ

kitāb-e-tārīḳh-e-zindagī ke varaq varaq par tirī kahānī

jo tū na hotī to yuuñ daraḳhshanda sham-e-bazm-e-jahāñ na hotī

vajūd-e-arz-o-samā na hotā numūd-e-kaun-o-makāñ na hotī

bashar kī mahdūdiyat kī ḳhātir tarastī aalam kī be-karānī

tu prem mandir ki pak dewi tu husn ki mamlikat ki rani

hayat-e-insan ki qismaton par teri nigahon ki hukmarani

jahan-e-ulfat teri qalam-rau harim-e-dil teri rajdhani

bahaar-e-fitrat tere lab-e-lal-gun ki doshiza muskurahaT

nizam-e-kaunain teri aankhon ke surKH Doron ki thartharahaT

farogh-e-sad-kaenat teri jabin simin ki zau-fishani

bhaDakte sinon mein bas rahi hain qarar ban kar teri adaen

tarasti ruhon ko jam-e-ishrat pila rahi hain teri wafaen

rag-e-jahan mein thirak rahi hai sharab ban kar teri jawani

dimagh-e-parwar-digar mein jo azal ke din se machal raha tha

zaban-e-taKHliq-e-dahr se bhi na jis ka izhaar ho saka tha

numud teri usi muqaddas hasin taKHayyul ki tarjumani

hai wadi-e-nil par tera abr-e-zulf saya-kunan abhi tak

hain jam-e-iran ki mai mein tere labon ki shiriniyan abhi tak

fasana-go hai teri abhi tak hadis-e-yunan ki KHun-chakani'

hai teri ulfat ke rag par mauj-e-rud-e-ganga ko wajd ab tak

teri mohabbat ki aag mein jal raha hai sahra-e-najd ab tak

jamal-e-zahra tere malaek fareb jalwon ki ek nishani

teri nigahon ke sahar se gul-fishan hai sher o adab ki duniya

tere tabassum ke kaif se hai ye gham ki duniya tarab ki duniya

tere labon ki miThas se shakkarin hai zahrab-e-zindagani

tera tabassum kali kali mein tera tarannum chaman chaman mein

rumuz-e-hasti ke pech-o-KHam tere gesuon ki shikan shikan mein

kitab-e-tariKH-e-zindagi ke waraq waraq par teri kahani

jo tu na hoti to yun daraKHshanda sham-e-bazm-e-jahan na hoti

wajud-e-arz-o-sama na hota numud-e-kaun-o-makan na hoti

bashar ki mahdudiyat ki KHatir tarasti aalam ki be-karani