aurat

banāyā hai musavvir ne hasīñ shahkār aurat ko

alag pahchān detā hai kahānī-kār aurat ko

vo maañ ho bahan biivī yā ki beTī ho suno logo

har ik kirdār meñ rakkhā gayā ġham-ḳhvār aurat ko

yahī sach-much banā degī tire ghar ko hasīñ jannat

zarā tum pyaar se karnā kabhī sarshār aurat ko

phir ik din un kī qismat meñ likhī jaatī hai rusvā.ī

zamāne meñ samajhte haiñ jo kārobār aurat ko

usī kā ruup dhāre phir rahī haiñ kuchh chuḌeleñ bhī

maiñ aurat hī nahīñ kahtā kisī makkār aurat ko

salām un auratoñ par jo ki maa.eñ haiñ shahīdoñ kī

salāmī pesh kartā huuñ maiñ sau sau baar aurat ko

mujhe us vaqt 'arshad' kyoñ mirī maañ yaad aatī hai

kisī kuTiyā meñ dekhūñ jab kisī lāchār aurat ko

banaya hai musawwir ne hasin shahkar aurat ko

alag pahchan deta hai kahani-kar aurat ko

wo man ho bahan biwi ya ki beTi ho suno logo

har ek kirdar mein rakkha gaya gham-KHwar aurat ko

yahi sach-much bana degi tere ghar ko hasin jannat

zara tum pyar se karna kabhi sarshaar aurat ko

phir ek din un ki qismat mein likhi jati hai ruswai

zamane mein samajhte hain jo karobar aurat ko

usi ka rup dhaare phir rahi hain kuchh chuDelen bhi

main aurat hi nahin kahta kisi makkar aurat ko

salam un auraton par jo ki maen hain shahidon ki

salami pesh karta hun main sau sau bar aurat ko

mujhe us waqt 'arshad' kyon meri man yaad aati hai

kisi kuTiya mein dekhun jab kisi lachaar aurat ko