barf-zad

london

dhund kā hākim

dariyā-e-'thames' kī āġhosh meñ leTā huā

vaqt kā purānā amiin

jahāñ big ben kī dhīmī zarboñ meñ

sadiyoñ kī sāñseñ gūñjtī haiñ

aur puloñ ke nīche

paanī nahīñ tārīḳh bahtī hai

jahāñ īñToñ kī surḳh dīvāreñ

bārish meñ bhiig kar

apnī tanhā.ī chamkātī haiñ

aur galiyoñ meñ chaltī havā

kisī purāne novel kā varaq ulaTtī mahsūs hotī hai

usī london kī ek sard samt meñ

jahāñ sub.h bhī dhund ke parde meñ janam letī hai

aur shāmeñ charāġhoñ se pahle

sāyoñ ko raushan kartī haiñ

vahāñ ek shaḳhs rahtā thā

jise log

barf-zād kahte the

vo aag kā kārīgar nahīñ thā

na miTTī kā ḳhāliq

vo barf tarāshtā thā

us ke hāthoñ meñ

sardī kī ek 'ajīb mahārat thī

vo jame hue paanī se

parinde banātā

jo uḌ nahīñ sakte the

ghoḌe banātā

jo dauḌ nahīñ sakte the

aur insān banātā

jin kī āñkhoñ meñ

koī ḳhvāb nahīñ hotā thā

london ke sayyāh

us ke kār-ḳhāne tak aate

tasvīreñ lete

hairat se sar hilāte

magar koī mujassama ghar na le jaatā

ki barf ko ghar le jaanā

ghultī huī zimmedārī uThānā thā

ek din

junūbī havā ke saath

ek musāfir laḌkī aa.ī

us ke qadmoñ ke nīche

london kī barf pighaltī jaatī thī

us kī saañs meñ harārat thī

aur us kī hañsī meñ

koī aisā mausam

jo us shahr meñ kam-yāb thā

barf-zād ne pahlī baar

apne hāthoñ kī sardī se ḳhauf mahsūs kiyā

us ne chāhā

ki us laḌkī ke liye

ek aisā mujassama banā.e

jo na pighle

us ne saat rāteñ

thames ke kināre jaag kar

ek paikar tarāshā

barf kā nahīñ

apne yaqīn kā

magar sub.h huī

to london kī maddham dhuup ne

us ke saare ḳhvāb

qatroñ meñ badal diye

vo laḌkī

muskurā kar bolī

jo chiiz pighal jaa.e

vahī zinda hotī hai

ye jumla

barf-zād ke liye

big ben kī ghanTī se bhī bhārī thā

vo jis ne hamesha

jamāv ko kamāl samjhā thā

pighalne ko shikast jaanā thā

aaj pahlī baar

us ne darāḌoñ meñ

zindagī kī chaap sunī

us ne apne kār-ḳhāne kī khiḌkiyāñ khol diiñ

dhuup andar aa.ī

mujassame bahne lage

chehre bigaḌne lage

aur farsh par

paanī kī ek be-tartīb nadī bahne lagī

log chīḳhe

tum ne apnī 'umr kā hunar

zaa.e' kar diyā

magar barf-zād

us paanī meñ nange paaoñ khaḌā thā

use lagā

vo pahlī baar

zamīn ko chhū rahā hai

vo laḌkī

chalī ga.ī

junūb kī taraf

apne mausamoñ kī taraf

magar us ke baa'd

london kī sard galiyoñ meñ

ek na.ī ḳhabar phail ga.ī

barf-zād ab bhī

mujassame banātā hai

magar vo unheñ

band kamroñ meñ nahīñ rakhtā

vo jaan buujh kar

unheñ dhuup ke sāmne rakh detā hai

tā-ki log dekh sakeñ

ki ḳhūb-sūratī

hamesha qaa.em rahne kā naam nahīñ

kabhī kabhī

ḳhatm ho jaane kā naam bhī hai

aur jab bhī

'thames' ke uupar

dhuup kī halkī lakīr utartī hai

vo muskurā kar kahtā hai

aao

aaj phir kuchh pighlā.eñ

aaj phir kuchh pighlā.eñ

london

dhund ka hakim

dariya-e-'thames' ki aaghosh mein leTa hua

waqt ka purana amin

jahan big ben ki dhimi zarbon mein

sadiyon ki sansen gunjti hain

aur pulon ke niche

pani nahin tariKH bahti hai

jahan inTon ki surKH diwaren

barish mein bhig kar

apni tanhai chamkati hain

aur galiyon mein chalti hawa

kisi purane nowel ka waraq ulaTti mahsus hoti hai

usi london ki ek sard samt mein

jahan subh bhi dhund ke parde mein janam leti hai

aur shamen charaghon se pahle

sayon ko raushan karti hain

wahan ek shaKHs rahta tha

jise log

barf-zad kahte the

wo aag ka karigar nahin tha

na miTTi ka KHaliq

wo barf tarashta tha

us ke hathon mein

sardi ki ek 'ajib mahaarat thi

wo jame hue pani se

parinde banata

jo uD nahin sakte the

ghoDe banata

jo dauD nahin sakte the

aur insan banata

jin ki aankhon mein

koi KHwab nahin hota tha

london ke sayyah

us ke kar-KHane tak aate

taswiren lete

hairat se sar hilate

magar koi mujassama ghar na le jata

ki barf ko ghar le jaana

ghulti hui zimmedari uThana tha

ek din

junubi hawa ke sath

ek musafir laDki aai

us ke qadmon ke niche

london ki barf pighalti jati thi

us ki sans mein hararat thi

aur us ki hansi mein

koi aisa mausam

jo us shahr mein kam-yab tha

barf-zad ne pahli bar

apne hathon ki sardi se KHauf mahsus kiya

us ne chaha

ki us laDki ke liye

ek aisa mujassama banae

jo na pighle

us ne sat raaten

thames ke kinare jag kar

ek paikar tarasha

barf ka nahin

apne yaqin ka

magar subh hui

to london ki maddham dhup ne

us ke sare KHwab

qatron mein badal diye

wo laDki

muskura kar boli

jo chiz pighal jae

wahi zinda hoti hai

ye jumla

barf-zad ke liye

big ben ki ghanTi se bhi bhaari tha

wo jis ne hamesha

jamaw ko kamal samjha tha

pighalne ko shikast jaana tha

aaj pahli bar

us ne daraDon mein

zindagi ki chap suni

us ne apne kar-KHane ki khiDkiyan khol din

dhup andar aai

mujassame bahne lage

chehre bigaDne lage

aur farsh par

pani ki ek be-tartib nadi bahne lagi

log chiKHe

tum ne apni 'umr ka hunar

zae' kar diya

magar barf-zad

us pani mein nange paon khaDa tha

use laga

wo pahli bar

zamin ko chhu raha hai

wo laDki

chali gai

junub ki taraf

apne mausamon ki taraf

magar us ke ba'd

london ki sard galiyon mein

ek nai KHabar phail gai

barf-zad ab bhi

mujassame banata hai

magar wo unhen

band kamron mein nahin rakhta

wo jaan bujh kar

unhen dhup ke samne rakh deta hai

ta-ki log dekh saken

ki KHub-surati

hamesha qaem rahne ka nam nahin

kabhi kabhi

KHatm ho jaane ka nam bhi hai

aur jab bhi

'thames' ke upar

dhup ki halki lakir utarti hai

wo muskura kar kahta hai

aao

aaj phir kuchh pighlaen

aaj phir kuchh pighlaen