harfon mein base fasle

suno

ai suḳhan ke rāz-dāñ

ai lafzoñ ke amiin

tum shāyad kisī duur nagar kī shaam meñ

khiḌkī ke paas baiThe

Dūbte sūraj ko nazm banā rahe ho

aur maiñ yahāñ

apnī raat kī dahlīz par

tumhāre misra'oñ kī aahaT sun rahī huuñ

ham donoñ ke darmiyān

na-jāne kitne mausamoñ kā fāsla hai

kitne shahr

kitnī saḌkeñ

kitnī ḳhāmoshiyāñ

magar 'ajīb baat hai

tumhārī tahrīr jab safhe par ubhartī hai

to yuuñ lagtā hai

jaise mere dil kī dhaḌkan

tumhārī uñgliyoñ kī jumbish se bañdhī ho

tum lafz nahīñ likhte

tum darīche kholte ho

aur un darīchoñ se

havā ke narm jhoñke

mere kamra-e-jāñ meñ dāḳhil hote haiñ

tumhārī shā'irī

koī buland dā'vā nahīñ kartī

vo bas chupke se aatī hai

aur mere andar

ek charāġh rakh jaatī hai

phir maiñ dekhtī huuñ

vahī charāġh

bādaloñ ko rang detā hai

bārish ko naġhma banā detā hai

aur chāñd ko

mohabbat kī ḳhāmosh mohr

suno

ai majnūn shā'ir

aaj ek tanhā dil ne

apnī saarī udāsī

harfoñ ke kaTore meñ rakh kar

tumhāre naam kar dī hai

maiñ ne raat kī peshānī se

chand sitāre utāre

aur unheñ siyāhī meñ ghol kar

ek nazm tarāshī hai

ye nazm

koī savāl nahīñ

koī shikva nahīñ

ye sirf ek dā'vat hai

ki kabhī

kisī shaam

tum mere rū-barū baiTho

aur maiñ tumheñ sunā.ūñ

vo sab kuchh

jo tum ne likhā to nahīñ

magar maiñ ne paḌh liyā

sunoge naañ

ai suḳhan ke musāfir

agar tum aao

to shāyad fāsle

sirf naqshe kī lakīr rah jaa.eñ

aur ham

ek hī āsmān ke nīche

ek hī lafz ke mā'nī ban jaa.eñ

ek hī lafz ke mā'nī ban jaa.eñ

suno

ai suKHan ke raaz-dan

ai lafzon ke amin

tum shayad kisi dur nagar ki sham mein

khiDki ke pas baiThe

Dubte suraj ko nazm bana rahe ho

aur main yahan

apni raat ki dahliz par

tumhaare misra'on ki aahaT sun rahi hun

hum donon ke darmiyan

na-jaane kitne mausamon ka fasla hai

kitne shahr

kitni saDken

kitni KHamoshiyan

magar 'ajib baat hai

tumhaari tahrir jab safhe par ubharti hai

to yun lagta hai

jaise mere dil ki dhaDkan

tumhaari ungliyon ki jumbish se bandhi ho

tum lafz nahin likhte

tum dariche kholte ho

aur un darichon se

hawa ke narm jhonke

mere kamra-e-jaan mein daKHil hote hain

tumhaari sha'iri

koi buland da'wa nahin karti

wo bas chupke se aati hai

aur mere andar

ek charagh rakh jati hai

phir main dekhti hun

wahi charagh

baadalon ko rang deta hai

barish ko naghma bana deta hai

aur chand ko

mohabbat ki KHamosh mohr

suno

ai majnun sha'ir

aaj ek tanha dil ne

apni sari udasi

harfon ke kaTore mein rakh kar

tumhaare nam kar di hai

main ne raat ki peshani se

chand sitare utare

aur unhen siyahi mein ghol kar

ek nazm tarashi hai

ye nazm

koi sawal nahin

koi shikwa nahin

ye sirf ek da'wat hai

ki kabhi

kisi sham

tum mere ru-baru baiTho

aur main tumhein sunaun

wo sab kuchh

jo tum ne likha to nahin

magar main ne paDh liya

sunoge nan

ai suKHan ke musafir

agar tum aao

to shayad fasle

sirf naqshe ki lakir rah jaen

aur hum

ek hi aasman ke niche

ek hi lafz ke ma'ni ban jaen

ek hi lafz ke ma'ni ban jaen