hamara shughl jo zikr-e-rasul ho jae

hamārā shuġhl jo zikr-e-rasūl ho jaa.e

jo nikle baat zabāñ se qubūl ho jaa.e

du'ā hamārī ye yā-rab qubūl ho jaa.e

hamārā dil bhī dayār-e-rasūl ho jaa.e

tajalliyoñ kā nazar par nuzūl ho jaa.e

mujhe jo ḳhvāb meñ dīd-e-rasūl ho jaa.e

jo naa't gosh-guzār-e-rasūl ho jaa.e

to saarī 'umr kī kāvish vasūl ho jaa.e

tamām 'umr bhaTaktā phirūñ maiñ galiyoñ meñ

madīna jā ke ye dānista bhuul ho jaa.e

har ek manzil-e-‘irfāñ mire qadam chūme

mirī hayāt jo vaqf-e-rasūl ho jaa.e

haqīqatan vahī mere nabī ko pyārā hai

ġham-e-husain meñ jo dil malūl ho jaa.e

hayāt-e-momina duniyā meñ ik namūna hai

agar shi'ār hayā-e-butūl ho jaa.e

bulāvā aa.e madīne kā sar ke bal pahuñchūñ

jo ḳhaar raah meñ aa.e vo phuul ho jaa.e

agar ḳhulūs-o-mohabbat na us meñ shāmil ho

tirī har ek 'ibādat fuzūl ho jaa.e

mirā yaqīn hai shāmil durūd jis meñ ho

du'ā vo 'arsh pe pahuñche qubūl ho jaa.e

baḌhe haiñ abraha allāh tere ghar kī taraf

ki sang-rezoñ kā un par nuzūl ho jaa.e

sadā azān-e-bilālī kī har taraf gūñje

'umar ke daur kā nāfiz usuul ho jaa.e

ilāhī maut jo aa.e nabī kī chaukhaT ho

'jamīl' qādrī miT miT ke dhuul ho jaa.e

hamara shughl jo zikr-e-rasul ho jae

jo nikle baat zaban se qubul ho jae

du'a hamari ye ya-rab qubul ho jae

hamara dil bhi dayar-e-rasul ho jae

tajalliyon ka nazar par nuzul ho jae

mujhe jo KHwab mein did-e-rasul ho jae

jo na't gosh-guzar-e-rasul ho jae

to sari 'umr ki kawish wasul ho jae

tamam 'umr bhaTakta phirun main galiyon mein

madina ja ke ye danista bhul ho jae

har ek manzil-e-‘irfan mere qadam chume

meri hayat jo waqf-e-rasul ho jae

haqiqatan wahi mere nabi ko pyara hai

gham-e-husain mein jo dil malul ho jae

hayat-e-momina duniya mein ek namuna hai

agar shi'ar haya-e-butul ho jae

bulawa aae madine ka sar ke bal pahunchun

jo KHar rah mein aae wo phul ho jae

agar KHulus-o-mohabbat na us mein shamil ho

teri har ek 'ibaadat fuzul ho jae

mera yaqin hai shamil durud jis mein ho

du'a wo 'arsh pe pahunche qubul ho jae

baDhe hain abraha allah tere ghar ki taraf

ki sang-rezon ka un par nuzul ho jae

sada azan-e-bilali ki har taraf gunje

'umar ke daur ka nafiz usul ho jae

ilahi maut jo aae nabi ki chaukhaT ho

'jamil' qadri miT miT ke dhul ho jae