aap ki mohabbat mein jaan-o-dil luTana hai

aap kī mohabbat meñ jān-o-dil luTānā hai

aap se mujhe aaqā 'ishq vālihāna hai

aarzū hai ye dil kī phir madīne jaanā hai

mustafā ko ro ro kar hāl-e-dil sunānā hai

mustafā kī mahfil meñ bā-adab 'aqīdat se

mid.hat-e-mohammad meñ she'r gungunānā hai

phir dar-e-mohammad meñ hāzirī 'atā ho jaa.e

iltijā ḳhudā se ye merī 'ājizāna hai

aap shāfe'-e-mahshar aap qāsim-e-kausar

aap kī shafā'at se ḳhuld ham ko jaanā hai

kis tarah shah-e-dīñ ke mo'jize maiñ ginvā.ūñ

zindagī kā har lamha un kā mo'jizāna hai

ḳhauf kyā ho mahshar kī tez dhuup kā 'mehrū'

dāman-e-mohammad kā sar pe shāmiyāna hai

aap ki mohabbat mein jaan-o-dil luTana hai

aap se mujhe aaqa 'ishq walihana hai

aarzu hai ye dil ki phir madine jaana hai

mustafa ko ro ro kar haal-e-dil sunana hai

mustafa ki mahfil mein ba-adab 'aqidat se

midhat-e-mohammad mein she'r gungunana hai

phir dar-e-mohammad mein haziri 'ata ho jae

iltija KHuda se ye meri 'ajizana hai

aap shafe'-e-mahshar aap qasim-e-kausar

aap ki shafa'at se KHuld hum ko jaana hai

kis tarah shah-e-din ke mo'jize main ginwaun

zindagi ka har lamha un ka mo'jizana hai

KHauf kya ho mahshar ki tez dhup ka 'mehru'

daman-e-mohammad ka sar pe shamiyana hai