koi mane na mane tum hi tum ho bil-yaqin tum ho

koī maane na maane tum hī tum ho bil-yaqīñ tum ho

shah-e-laulāk be-shak sāhab-e-'arsh-e-barīñ tum ho

ba-amr-e-rab ze aadam tā-ba īñ-dam kār-farmā hai

vo rūh-e-avvalīñ tum ho vo 'aql-e-avvalīñ tum ho

tumhārī sar-navisht-e-zindagī kā naam qur.āñ hai

vo chaltī phirtī ik tasvīr-e-qur.ān-e-mubīñ tum ho

nahīñ tum sā haqīqat meñ sadāqat meñ amānat meñ

haqīqat meñ har ik haqq-o-sadāqat ke amiiñ tum ho

diloñ se kufr kī zulmat miTā.ī shirk zehnoñ se

munavvar do jahāñ jin se haiñ vo māh-e-mubīñ tum ho

'azāb-e-ijtimā'ī phir na aayā jab se tum aa.e

zamāna mo'tarif hai rahmatullil-‘ālamīñ tum ho

karo phir pairvī-e-usva-e-hasna bano rahbar

zamāna muntazir hai jin kā vo ‘ahd-āfrīñ tum ho

ġhulāmoñ ko madīne meñ bulā kar shaad farmāo

kahīñ bande kahīñ aaqā kahīñ ham haiñ kahīñ tum ho

dikhā do phir se 'tābāñ' ko jamāl apnā shah-e-vālā

in āñkhoñ meñ bhī aa jaao ki is dil ke makīñ tum ho

koi mane na mane tum hi tum ho bil-yaqin tum ho

shah-e-laulak be-shak sahab-e-'arsh-e-barin tum ho

ba-amr-e-rab ze aadam ta-ba in-dam kar-farma hai

wo ruh-e-awwalin tum ho wo 'aql-e-awwalin tum ho

tumhaari sar-nawisht-e-zindagi ka nam quran hai

wo chalti phirti ek taswir-e-quran-e-mubin tum ho

nahin tum sa haqiqat mein sadaqat mein amanat mein

haqiqat mein har ek haqq-o-sadaqat ke amin tum ho

dilon se kufr ki zulmat miTai shirk zehnon se

munawwar do jahan jin se hain wo mah-e-mubin tum ho

'azab-e-ijtima'i phir na aaya jab se tum aae

zamana mo'tarif hai rahmatullil-‘alamin tum ho

karo phir pairwi-e-uswa-e-hasna bano rahbar

zamana muntazir hai jin ka wo ‘ahd-afrin tum ho

ghulamon ko madine mein bula kar shad farmao

kahin bande kahin aaqa kahin hum hain kahin tum ho

dikha do phir se 'taban' ko jamal apna shah-e-wala

in aankhon mein bhi aa jao ki is dil ke makin tum ho