ghar-damad ki mushkilen

jaanā thā sasurāl se mushkil rahne meñ rusvā.ī thī

ham ne tere jahāñ meñ maulā kaisī qismat paa.ī thī

saas susar kī ḳhidmat meñ hameñ saarā din lag jaatā thā

phir bhī ham ko biivī ne har baat pe DaañT pilā.ī thī

ham hī the taqdīr ke maare jo is ghar meñ biyāhe ga.e

varna bahut se dāmādoñ kī lottery bhī nikal aa.ī thī

ab rote haiñ us din ko jab haañ kah kar muskā.e the

kyā ma.alūm thā us muskān se ham ne ġhulāmī paa.ī thī

ban ga.e ghar-dāmād to phir bhalā kaun hameñ izzat detā

saas piTā.ī kar ke ga.ī to susar ne DaañT pilā.ī thī

izzat-e-nafs kā saudā kar ke ḳhuun ke ghūñT piye har dam

bhīgī billī ban kar ham ne apnī umr bitā.ī thī

jaana tha sasural se mushkil rahne mein ruswai thi

hum ne tere jahan mein maula kaisi qismat pai thi

sas susar ki KHidmat mein hamein sara din lag jata tha

phir bhi hum ko biwi ne har baat pe DanT pilai thi

hum hi the taqdir ke mare jo is ghar mein biyahe gae

warna bahut se damadon ki lottery bhi nikal aai thi

ab rote hain us din ko jab han kah kar muskae the

kya malum tha us muskan se hum ne ghulami pai thi

ban gae ghar-damad to phir bhala kaun hamein izzat deta

sas piTai kar ke gai to susar ne DanT pilai thi

izzat-e-nafs ka sauda kar ke KHun ke ghunT piye har dam

bhigi billi ban kar hum ne apni umr bitai thi