auraton ki assembly

vo shānoñ pe zarkār āñchal uchhāle

idhar se udhar mast zulfoñ ko Daale

miyāñ aur bachche ḳhudā ke havāle

hasīñ haath meñ narm file sambhāle

kis andāz se naaz farmā rahī hai

ki jaise chaman meñ bahār aa rahī hai

mabāhis meñ yuuñ garm-guftār haiñ sab

ki bas laḌne marne ko tayyār haiñ sab

fusūñ-kār haiñ sab tarah-dār haiñ sab

barābar barābar kī sarkār haiñ sab

idhar asġharī bhaḌak ga.ī akbarī se

idhar tifl rone lage gallery se

''spēchoñ'' meñ goTe-kanārī kī bāteñ

baho kī kifāyat-shi.ārī kī bāteñ

paḌosan kī parhez-gārī kī bāteñ

ġharaz har biyāhī kuñvārī kī bāteñ

ravāñ haiñ hujūm-e-tajallī ke dhāre

ye āñchal sameTe vo gesū sañvāre

dam-e-guftugū koī jiite na haare

sitāroñ se Takrā rahe haiñ sitāre

buā ko to dekho na gahnā na paatā

bajaT haath meñ jaise dhobin kā khātā

ba-andāz-e-ġhaiz-o-ġhazab boltī haiñ

ba-āvāz-e-shor-o-shaġhab boltī haiñ

nahīñ boltī haiñ to kab boltī haiñ

ye jab boltī haiñ to sab boltī haiñ

ma.an apne ḳhvāboñ meñ gum ho ga.ī haiñ

abhī jāgtī thiiñ abhī so ga.ī haiñ

wo shanon pe zarkar aanchal uchhaale

idhar se udhar mast zulfon ko Dale

miyan aur bachche KHuda ke hawale

hasin hath mein narm file sambhaale

kis andaz se naz farma rahi hai

ki jaise chaman mein bahaar aa rahi hai

mabahis mein yun garm-guftar hain sab

ki bas laDne marne ko tayyar hain sab

fusun-kar hain sab tarah-dar hain sab

barabar barabar ki sarkar hain sab

idhar asghari bhaDak gai akbari se

idhar tifl rone lage gallery se

speechon mein goTe-kanari ki baaten

baho ki kifayat-shiari ki baaten

paDosan ki parhez-gari ki baaten

gharaz har biyahi kunwari ki baaten

rawan hain hujum-e-tajalli ke dhaare

ye aanchal sameTe wo gesu sanware

dam-e-guftugu koi jite na haare

sitaron se Takra rahe hain sitare

bua ko to dekho na gahna na pata

bajaT hath mein jaise dhobin ka khata

ba-andaz-e-ghaiz-o-ghazab bolti hain

ba-awaz-e-shor-o-shaghab bolti hain

nahin bolti hain to kab bolti hain

ye jab bolti hain to sab bolti hain

man apne KHwabon mein gum ho gai hain

abhi jagti thin abhi so gai hain