soi hui duniya mein hain bedar hazaron

soī huī duniyā meñ haiñ bedār hazāroñ

haq ke liye jaate haiñ sū-e-dār hazāroñ

maiñ haq pe huuñ aur is kī gavāhī haiñ ye zālim

ik sar hai mire dosh pe talvār hazāroñ

kis kis ko pilā.e vo kise chhoḌ de pyāsā

kuchh jaam haiñ mai-ḳhāne meñ mai-ḳhvār hazāroñ

phailī jo ḳhabar sair ko guzregā idhar se

dil pakḌe hue baiThe haiñ bīmār hazāroñ

jaise hī kahā dil ko huuñ maiñ bechne vaalā

shahroñ meñ sajā.e gaye bāzār hazāroñ

mazlūm kī ḳhātir haiñ qalam saare apāhij

zālim kī himāyat meñ haiñ aḳhbār hazāroñ

ye sirf tire husn ke jaadū kā asar hai

dekhā to hue ziist se bezār hazāroñ

thak haar ke baiThā na musāfir ye safar meñ

rāhoñ meñ uThā.ī ga.ī dīvār hazāroñ

soi hui duniya mein hain bedar hazaron

haq ke liye jate hain su-e-dar hazaron

main haq pe hun aur is ki gawahi hain ye zalim

ek sar hai mere dosh pe talwar hazaron

kis kis ko pilae wo kise chhoD de pyasa

kuchh jam hain mai-KHane mein mai-KHwar hazaron

phaili jo KHabar sair ko guzrega idhar se

dil pakDe hue baiThe hain bimar hazaron

jaise hi kaha dil ko hun main bechne wala

shahron mein sajae gaye bazar hazaron

mazlum ki KHatir hain qalam sare apahij

zalim ki himayat mein hain aKHbar hazaron

ye sirf tere husn ke jadu ka asar hai

dekha to hue zist se bezar hazaron

thak haar ke baiTha na musafir ye safar mein

rahon mein uThai gai diwar hazaron