charagh gul kiye baiTha hun dil-jalon ki tarah

charāġh gul kiye baiThā huuñ dil-jaloñ kī tarah

maiñ apne ghar meñ huuñ lekin musāfiroñ kī tarah

nishān jis kī salāsil ke mere jism pe haiñ

ulajh paḌā huuñ usī se maiñ sar-phiroñ kī tarah

ma.āl-e-kār-e-garebāñ pe haath jā pohñchā

maiñ jī sakā na bahut der be-diloñ kī tarah

jo ḳhāk-e-rah kī tarah mujh ko rauñd rauñd gayā

usī ke paaoñ se ubhrā huuñ ābloñ kī tarah

vo jis ke naġhmoñ se mā'mūr thī fazā saarī

vo bas gayā mire kānoñ meñ āhaToñ kī tarah

havā chalī thī kuchh aisī amaañ na miltī thī

hue the shahr bhī sunsān jangaloñ kī tarah

jahāñ se māñgtī phirtī haiñ ab suhāg kī bhiik

vo vādiyāñ ki damaktī thiiñ dulhanoñ kī tarah

ye rāste kabhī be-nūr ho nahīñ sakte

daraḳht jalte haiñ 'shahzād' mash'aloñ kī tarah

charagh gul kiye baiTha hun dil-jalon ki tarah

main apne ghar mein hun lekin musafiron ki tarah

nishan jis ki salasil ke mere jism pe hain

ulajh paDa hun usi se main sar-phiron ki tarah

maal-e-kar-e-gareban pe hath ja pohncha

main ji saka na bahut der be-dilon ki tarah

jo KHak-e-rah ki tarah mujh ko raund raund gaya

usi ke paon se ubhra hun aablon ki tarah

wo jis ke naghmon se ma'mur thi faza sari

wo bas gaya mere kanon mein aahaTon ki tarah

hawa chali thi kuchh aisi aman na milti thi

hue the shahr bhi sunsan jangalon ki tarah

jahan se mangti phirti hain ab suhag ki bhik

wo wadiyan ki damakti thin dulhanon ki tarah

ye raste kabhi be-nur ho nahin sakte

daraKHt jalte hain 'shahzad' mash'alon ki tarah