zindagi KHwabon se bahlate nahin

zindagī ḳhvāboñ se bahlāte nahīñ

apne dhoke meñ bhī ham aate nahīñ

aise bhī kuchh rāste haiñ shahr meñ

jo kahīñ aate nahīñ jaate nahīñ

kitnī aisī zinda lāsheñ haiñ jinheñ

ehtirāman log dafnāte nahīñ

zindagānī ke kisī manzar se ham

be-niyāzāna guzar jaate nahīñ

luTte haiñ māl-e-ġhanīmat kī tarah

ham kisī saa.il ko tarsāte nahīñ

rut ho tūfānoñ kī yā fasl-e-ḳhizāñ

ġhuncha-o-gul sang ban jaate nahīñ

kis qadar zinda haqā.eq haiñ magar

kam-savādoñ ko nazar aate nahīñ

zindagi KHwabon se bahlate nahin

apne dhoke mein bhi hum aate nahin

aise bhi kuchh raste hain shahr mein

jo kahin aate nahin jate nahin

kitni aisi zinda lashen hain jinhen

ehtiraman log dafnate nahin

zindagani ke kisi manzar se hum

be-niyazana guzar jate nahin

luTte hain mal-e-ghanimat ki tarah

hum kisi sail ko tarsate nahin

rut ho tufanon ki ya fasl-e-KHizan

ghuncha-o-gul sang ban jate nahin

kis qadar zinda haqaeq hain magar

kam-sawadon ko nazar aate nahin