za’m-e-hasti ek lamhe mein hawa ho jaega

za’m-e-hastī ek lamhe meñ havā ho jā.egā

jab haqīqat se tumhārā sāmnā ho jā.egā

maiñ hamesha ke liye samjhūñgā ḳhud ko sarbarāh

aur phir ik din mirā beTā baḌā ho jā.egā

sāmne rakh kar haqā.eq hausle tartīb do

varna paimān-e-mohabbat khokhlā ho jā.egā

dil mirā TūTegā ummīdeñ fanā ho jā.eñgī

is se baḌh kar tum batāo aur kyā ho jā.egā

dekhiye sāhab hai kursī zarf vāloñ ke liye

jab koī kam-zarf baiThegā ḳhudā ho jā.egā

titliyāñ raḳht-e-safar bāñdheñgī mar jā.eñge phuul

aap ke jaane se manzar bad-numā ho jā.egā

chhoḌiye bejā pareshānī kā hāsil kuchh nahīñ

jo bhī achchhā yā burā honā huā ho jā.egā

kaun detā hai hamesha saath 'nāzir' dekhnā

shaam hote hī ye saaya bevafā ho jā.egā

za’m-e-hasti ek lamhe mein hawa ho jaega

jab haqiqat se tumhaara samna ho jaega

main hamesha ke liye samjhunga KHud ko sarbarah

aur phir ek din mera beTa baDa ho jaega

samne rakh kar haqaeq hausle tartib do

warna paiman-e-mohabbat khokhla ho jaega

dil mera TuTega ummiden fana ho jaengi

is se baDh kar tum batao aur kya ho jaega

dekhiye sahab hai kursi zarf walon ke liye

jab koi kam-zarf baiThega KHuda ho jaega

titliyan raKHt-e-safar bandhengi mar jaenge phul

aap ke jaane se manzar bad-numa ho jaega

chhoDiye beja pareshani ka hasil kuchh nahin

jo bhi achchha ya bura hona hua ho jaega

kaun deta hai hamesha sath 'nazir' dekhna

sham hote hi ye saya bewafa ho jaega