rasta bhi kaThin dhup mein shiddat bhi bahut thi

rasta bhī kaThin dhuup meñ shiddat bhī bahut thī

saa.e se magar us ko mohabbat bhī bahut thī

ḳheme na koī mere musāfir ke jalā.e

zaḳhmī thā bahut paañv masāfat bhī bahut thī

sab dost mire muntazir-e-parda-e-shab the

din meñ to safar karne meñ diqqat bhī bahut thī

bārish kī duāoñ meñ namī aañkh kī mil jaa.e

jazbe kī kabhī itnī rifāqat bhī bahut thī

kuchh to tire mausam hī mujhe raas kam aa.e

aur kuchh mirī miTTī meñ baġhāvat bhī bahut thī

phūloñ kā bikharnā to muqaddar hī thā lekin

kuchh is meñ havāoñ kī siyāsat bhī bahut thī

vo bhī sar-e-maqtal hai ki sach jis kā thā shāhid

aur vāqif-e-ahvāl-e-adālat bhī bahut thī

is tark-e-rifāqat pe pareshāñ to huuñ lekin

ab tak ke tire saath pe hairat bhī bahut thī

ḳhush aa.e tujhe shahr-e-munāfiq kī amīrī

ham logoñ ko sach kahne kī aadat bhī bahut thī

rasta bhi kaThin dhup mein shiddat bhi bahut thi

sae se magar us ko mohabbat bhi bahut thi

KHeme na koi mere musafir ke jalae

zaKHmi tha bahut panw masafat bhi bahut thi

sab dost mere muntazir-e-parda-e-shab the

din mein to safar karne mein diqqat bhi bahut thi

barish ki duaon mein nami aankh ki mil jae

jazbe ki kabhi itni rifaqat bhi bahut thi

kuchh to tere mausam hi mujhe ras kam aae

aur kuchh meri miTTi mein baghawat bhi bahut thi

phulon ka bikharna to muqaddar hi tha lekin

kuchh is mein hawaon ki siyasat bhi bahut thi

wo bhi sar-e-maqtal hai ki sach jis ka tha shahid

aur waqif-e-ahwal-e-adalat bhi bahut thi

is tark-e-rifaqat pe pareshan to hun lekin

ab tak ke tere sath pe hairat bhi bahut thi

KHush aae tujhe shahr-e-munafiq ki amiri

hum logon ko sach kahne ki aadat bhi bahut thi