rabte bhi rakhta hun raste bhi rakhta hun

rābte bhī rakhtā huuñ rāste bhī rakhtā huuñ

har kisī se miltā huuñ fāsle bhī rakhtā huuñ

ġham kahāñ manātā huuñ chhoḌ jaane vāloñ kā

toḌ kar ta'alluq maiñ dar khule bhī rakhtā huuñ

mausamoñ kī gardish se maiñ nikal to aayā huuñ

yaad par ḳhizāoñ ke hādse bhī rakhtā huuñ

vaqt ke mutābiq ab ḳhud ko hai agar badlā

vaqt ko badalne ke hausle bhī rakhtā huuñ

bhar ke ek din ghaav saare bhuul jaate haiñ

zaḳhm so purāne kuchh an-sile bhī rakhtā huuñ

go kisī bhī manzil kī ab nahīñ talab mujh ko

har ghaḌī maiñ pairoñ meñ aable bhī rakhtā huuñ

māntā huuñ 'abrak' maiñ baat yaar logoñ kī

soch ke magar apne zāviye bhī rakhtā huuñ

rabte bhi rakhta hun raste bhi rakhta hun

har kisi se milta hun fasle bhi rakhta hun

gham kahan manata hun chhoD jaane walon ka

toD kar ta'alluq main dar khule bhi rakhta hun

mausamon ki gardish se main nikal to aaya hun

yaad par KHizaon ke hadse bhi rakhta hun

waqt ke mutabiq ab KHud ko hai agar badla

waqt ko badalne ke hausle bhi rakhta hun

bhar ke ek din ghaw sare bhul jate hain

zaKHm so purane kuchh an-sile bhi rakhta hun

go kisi bhi manzil ki ab nahin talab mujh ko

har ghaDi main pairon mein aable bhi rakhta hun

manta hun 'abrak' main baat yar logon ki

soch ke magar apne zawiye bhi rakhta hun