main kahan hun kuchh bata de zindagi ai zindagi!

maiñ kahāñ huuñ kuchh batā de zindagī ai zindagī!

phir sadā apnī sunā de zindagī ai zindagī!

so ga.e ik ek kar ke ḳhāna-e-dil ke charāġh

in charāġhoñ ko jagā de zindagī ai zindagī!

vo bisāt-e-sher-o-naġhma ratjage vo chahchahe

phir vahī mahfil sajā de zindagī ai zindagī!

jis ke har qatre se rag rag meñ machaltā thā lahū

phir vahī ik shai pilā de zindagī ai zindagī!

ab to yaad aatā nahīñ kaisā thā apnā rañg-rūp

phir mirī sūrat dikhā de zindagī ai zindagī!

ek muddat ho ga.ī rūThā huuñ apne-āp se

phir mujhe mujh se milā de zindagī ai zindagī!

jaane bargashta hai kyuuñ mujh se zamāne kī havā

apne dāman kī havā de zindagī ai zindagī!

rach gayā hai merī nas nas meñ mirī rātoñ kā zahr

mere sūraj ko bulā de zindagī ai zindagī!

main kahan hun kuchh bata de zindagi ai zindagi!

phir sada apni suna de zindagi ai zindagi!

so gae ek ek kar ke KHana-e-dil ke charagh

in charaghon ko jaga de zindagi ai zindagi!

wo bisat-e-sher-o-naghma ratjage wo chahchahe

phir wahi mahfil saja de zindagi ai zindagi!

jis ke har qatre se rag rag mein machalta tha lahu

phir wahi ek shai pila de zindagi ai zindagi!

ab to yaad aata nahin kaisa tha apna rang-rup

phir meri surat dikha de zindagi ai zindagi!

ek muddat ho gai ruTha hun apne-ap se

phir mujhe mujh se mila de zindagi ai zindagi!

jaane bargashta hai kyun mujh se zamane ki hawa

apne daman ki hawa de zindagi ai zindagi!

rach gaya hai meri nas nas mein meri raaton ka zahr

mere suraj ko bula de zindagi ai zindagi!