jo dekhte hain ghurub-e-aftab hote hue

jo dekhte haiñ ġhurūb-e-āftāb hote hue

hameñ bhī dekheñge ik roz ḳhvāb hote hue

dayār-e-'ishq meñ husn-o-shabāb hote hue

diye jalā.e haiñ kyuuñ māhtāb hote hue

jinhoñ ne ashk hamāre liye bahā.e haiñ

vo kaise dekheñge ham par 'azāb hote hue

bhaTak rahe haiñ jihālat ke tapte sahrā meñ

hamāre paas ik aisī kitāb hote hue

ghirī huī hai bhalā ziist kyuuñ añdheroñ meñ

charāġh hote hue māhtāb hote hue

vo baḳhsh degā mujhe ek sachchī tauba par

mire gunāh bahut be-hisāb hote hue

ḳhamosh baiThā rahā maiñ lihāz meñ us ke

har ek baat kā 'najmī' javāb hote hue

jo dekhte hain ghurub-e-aftab hote hue

hamein bhi dekhenge ek roz KHwab hote hue

dayar-e-'ishq mein husn-o-shabab hote hue

diye jalae hain kyun mahtab hote hue

jinhon ne ashk hamare liye bahae hain

wo kaise dekhenge hum par 'azab hote hue

bhaTak rahe hain jihaalat ke tapte sahra mein

hamare pas ek aisi kitab hote hue

ghiri hui hai bhala zist kyun andheron mein

charagh hote hue mahtab hote hue

wo baKHsh dega mujhe ek sachchi tauba par

mere gunah bahut be-hisab hote hue

KHamosh baiTha raha main lihaz mein us ke

har ek baat ka 'najmi' jawab hote hue