jo bujh rahe hain diye un ko ye KHabar karna

jo bujh rahe haiñ diye un ko ye ḳhabar karnā

unhī ke dam se hai mumkin huā sahar karnā

jo qāfiloñ meñ na the manziloñ ko jā pahuñche

koī sikhā.e hameñ is tarah safar karnā

bharose dil ke jo kiiñ hijrateñ to ye jaanā

hai is kā mashġhala bastī ko dar-ba-dar karnā

gañvā dī zindagī manzil kī chaah meñ ham ne

magar na chāhā kabhī rāstoñ ko ghar karnā

diloñ ke faisle hote nahīñ dimāġhoñ se

so ham ne chhoḌ diyā hai agar magar karnā

gar apne shām-o-sahar dekh leñ to ham jāneñ

du'ā ne chhoḌ diyā ab hai kyuuñ asar karnā

bas apne aap kī bātoñ meñ aa.e rahte haiñ

kisī ke bas meñ kahāñ ḳhūn-e-dil jigar karnā

qusūr vaqt bhalā kab mu'āf kartā hai

ḳhamīr meñ hī nahīñ is ke darguzar karnā

rahe vo shaad zamāne meñ sab kī hasrat hai

magar ye ḳhvāb hai aayā kise basar karnā

jo bujh rahe hain diye un ko ye KHabar karna

unhi ke dam se hai mumkin hua sahar karna

jo qafilon mein na the manzilon ko ja pahunche

koi sikhae hamein is tarah safar karna

bharose dil ke jo kin hijraten to ye jaana

hai is ka mashghala basti ko dar-ba-dar karna

ganwa di zindagi manzil ki chah mein hum ne

magar na chaha kabhi raston ko ghar karna

dilon ke faisle hote nahin dimaghon se

so hum ne chhoD diya hai agar magar karna

gar apne sham-o-sahar dekh len to hum jaanen

du'a ne chhoD diya ab hai kyun asar karna

bas apne aap ki baaton mein aae rahte hain

kisi ke bas mein kahan KHun-e-dil jigar karna

qusur waqt bhala kab mu'af karta hai

KHamir mein hi nahin is ke darguzar karna

rahe wo shad zamane mein sab ki hasrat hai

magar ye KHwab hai aaya kise basar karna