hamein jo bhane lagi be-ghari to kya hoga

hameñ jo bhāne lagī be-gharī to kyā hogā

ye dasht-gardī rahī dā.imī to kyā hogā

vo ik ḳhayāl ki jis se hai zindagī meñ ḳhushī

usī ḳhayāl ko maut aa ga.ī to kyā hogā

tum apnā bhaa.ī to kahte ho par mire bhaa.ī

kabhī jo darmiyāñ an-ban huī to kyā hogā

yuuñ khilkhilā ke hañso Thiik hai magar socho

laboñ se chhīn le koī ḳhushī to kyā hogā

saḳhāvatoñ ke natā.ej bure nikalte haiñ

dikhā.ī maiñ ne jo dariyā-dilī to kyā hogā

hai chand roz kī mehmān chāñdnī rāteñ

siyāh raat jo phir aa ga.ī to kyā hogā

ye chaar din kī kahāvat to Thiik hai 'az.har'

agar tavīl huī zindagī to kyā hogā

hamein jo bhane lagi be-ghari to kya hoga

ye dasht-gardi rahi daimi to kya hoga

wo ek KHayal ki jis se hai zindagi mein KHushi

usi KHayal ko maut aa gai to kya hoga

tum apna bhai to kahte ho par mere bhai

kabhi jo darmiyan an-ban hui to kya hoga

yun khilkhila ke hanso Thik hai magar socho

labon se chhin le koi KHushi to kya hoga

saKHawaton ke nataej bure nikalte hain

dikhai main ne jo dariya-dili to kya hoga

hai chand roz ki mehman chandni raaten

siyah raat jo phir aa gai to kya hoga

ye chaar din ki kahawat to Thik hai 'azhar'

agar tawil hui zindagi to kya hoga