agar had se tajawuz ho kasafat bhi nahin achchhi

agar had se tajāvuz ho kasāfat bhī nahīñ achchhī

jo ho me'yār se nīche nazāfat bhī nahīñ achchhī

mohabbat to muqaddar hai kabhī gul hai kabhī kāñTe

mu'ayyan had se aage ab latāfat bhī nahīñ achchhī

agar ye zindagī ham se ulajhne par hai āmāda

use taslīm karne kī sharāfat bhī nahīñ achchhī

kisī shorīda-sar kī pairvī meñ dasht mat jaanā

junūn-e-'ishq kī ḳhātir masāfat bhī nahīñ achchhī

hamāre pyaar ko tanz-o-tamasḳhur meñ na yuuñ Taalo

barā.e-dil-lagī itnī zarāfat bhī nahīñ achchhī

na bhuul ai ibn-e-ādam ḳhuld se apne nikalne ko

zarūrat se ziyāda ab ḳhilāfat bhī nahīñ achchhī

charāġh-e-sub.h hai kab tak jale aur 'naqsh' bujh jaa.e

shab-e-ġham kī tavālat meñ izāfat bhī nahīñ achchhī

agar had se tajawuz ho kasafat bhi nahin achchhi

jo ho me'yar se niche nazafat bhi nahin achchhi

mohabbat to muqaddar hai kabhi gul hai kabhi kanTe

mu'ayyan had se aage ab latafat bhi nahin achchhi

agar ye zindagi hum se ulajhne par hai aamada

use taslim karne ki sharafat bhi nahin achchhi

kisi shorida-sar ki pairwi mein dasht mat jaana

junun-e-'ishq ki KHatir masafat bhi nahin achchhi

hamare pyar ko tanz-o-tamasKHur mein na yun Talo

barae-dil-lagi itni zarafat bhi nahin achchhi

na bhul ai ibn-e-adam KHuld se apne nikalne ko

zarurat se ziyaada ab KHilafat bhi nahin achchhi

charagh-e-subh hai kab tak jale aur 'naqsh' bujh jae

shab-e-gham ki tawalat mein izafat bhi nahin achchhi