zehn-o-KHayal se koi chehra na ja saka

zehn-o-ḳhayāl se koī chehra na jā sakā

aur us ke aage ham se bhī sochā na jā sakā

ik jaan thī jo nazr guzārī na jā sakī

ik qarz thā jo ham se utārā na jā sakā

ham ne hazār jashn sahar ke manā liye

aur bām-o-dar se raat kā saaya na jā sakā

kitne tabāh hoñge ham ik shaḳhs ke liye

ḳhud se kabhī savāl ye pūchhā na jā sakā

kuchh pal ko ho gayā thā maiñ bhaḌkā huā charāġh

kuchh der āñdhiyoñ se bhī sambhlā na jā sakā

bas ik laraztā haath mire hoñT sī gayā

aur phir tamām zindagī bolā na jā sakā

ham us ko saarī umr uThā.e phirā kiye

jo baar 'mīr' se bhī uThāyā na jā sakā

'tāriq' ye dil bhī hai ḳhat-e-taqdīr kī tarah

ham ḳhud badal ga.e ise badlā na jā sakā

zehn-o-KHayal se koi chehra na ja saka

aur us ke aage hum se bhi socha na ja saka

ek jaan thi jo nazr guzari na ja saki

ek qarz tha jo hum se utara na ja saka

hum ne hazar jashn sahar ke mana liye

aur baam-o-dar se raat ka saya na ja saka

kitne tabah honge hum ek shaKHs ke liye

KHud se kabhi sawal ye puchha na ja saka

kuchh pal ko ho gaya tha main bhaDka hua charagh

kuchh der aandhiyon se bhi sambhla na ja saka

bas ek larazta hath mere honT si gaya

aur phir tamam zindagi bola na ja saka

hum us ko sari umr uThae phira kiye

jo bar 'mir' se bhi uThaya na ja saka

'tariq' ye dil bhi hai KHat-e-taqdir ki tarah

hum KHud badal gae ise badla na ja saka