zeb usko ye aashob-e-gadai nahin deta

zeb us ko ye āshob-e-gadā.ī nahīñ detā

dil mashvara-e-nāsiya-sā.ī nahīñ detā

kis dhund kī chādar meñ hai lipTī koī āvāz

dastak ke sivā kuchh bhī sunā.ī nahīñ detā

hai tā-hadd-e-imkāñ koī bastī na bayābāñ

āñkhoñ meñ koī ḳhvāb dikhā.ī nahīñ detā

aalam bhī qafas rañg hai aisā ki nazar ko

is dām-e-tahayyur se rihā.ī nahīñ detā

yādoñ ko sulā detā hai saa.e meñ shajar ke

vo hausla-e-dard-e-rasā.ī nahīñ detā

dil us kā hathelī pe hai mere liye lekin

hāthoñ meñ mire dast-e-hinā.ī nahīñ detā

ārā.ish-e-jāñ ke liye kaafī nahīñ vahshat

mujh ko to koī zaḳhm dikhā.ī nahīñ detā

is ishq meñ kuchh shā.iba-e-hirs bhī hogā

maiñ quvvat-e-bātin kī safā.ī nahīñ detā

raushan hai shab-e-hijr ba-andāz-e-ta.alluq

vo mehr-e-nazar dāġh-e-judā.ī nahīñ detā

zeb us ko ye aashob-e-gadai nahin deta

dil mashwara-e-nasiya-sai nahin deta

kis dhund ki chadar mein hai lipTi koi aawaz

dastak ke siwa kuchh bhi sunai nahin deta

hai ta-hadd-e-imkan koi basti na bayaban

aankhon mein koi KHwab dikhai nahin deta

aalam bhi qafas rang hai aisa ki nazar ko

is dam-e-tahayyur se rihai nahin deta

yaadon ko sula deta hai sae mein shajar ke

wo hausla-e-dard-e-rasai nahin deta

dil us ka hatheli pe hai mere liye lekin

hathon mein mere dast-e-hinai nahin deta

aaraish-e-jaan ke liye kafi nahin wahshat

mujh ko to koi zaKHm dikhai nahin deta

is ishq mein kuchh shaiba-e-hirs bhi hoga

main quwwat-e-baatin ki safai nahin deta

raushan hai shab-e-hijr ba-andaz-e-talluq

wo mehr-e-nazar dagh-e-judai nahin deta