sine ko chaak kar ke jigar se nikal gai

siine ko chaak kar ke jigar se nikal ga.ī

un kī nigāh-e-nāz chhurī thī ki chal ga.ī

kuchh merā fā.ida hai vo kuchh mujh se mil ga.e

maiñ kyā karūñ jo un se raqīboñ se chal ga.ī

sach hai sharīk-e-hāl musībat meñ kaun ho

ghabrā ke aaj aah bhī dil se nikal ga.ī

furqat meñ e'tibār hī kyā jān-e-zār kā

aaj un ke intizār meñ Thahrī to kal ga.ī

zikr-e-visāl sun ke hañsī aa ga.ī unheñ

jis kā mujhe ḳhayāl thā vo baat Tal ga.ī

ab kyā palaT ke ā.eñge āsūdgān-e-ḳhāk

bichhḌe huoñ se mil ke tabī'at bahal ga.ī

vo sohbateñ vo 'aish vo din ab kahāñ 'qamar'

un kī nigāh phirte hī duniyā badal ga.ī

sine ko chaak kar ke jigar se nikal gai

un ki nigah-e-naz chhuri thi ki chal gai

kuchh mera faida hai wo kuchh mujh se mil gae

main kya karun jo un se raqibon se chal gai

sach hai sharik-e-haal musibat mein kaun ho

ghabra ke aaj aah bhi dil se nikal gai

furqat mein e'tibar hi kya jaan-e-zar ka

aaj un ke intizar mein Thahri to kal gai

zikr-e-visal sun ke hansi aa gai unhen

jis ka mujhe KHayal tha wo baat Tal gai

ab kya palaT ke aaenge aasudgan-e-KHak

bichhDe huon se mil ke tabi'at bahal gai

wo sohbaten wo 'aish wo din ab kahan 'qamar'

un ki nigah phirte hi duniya badal gai