jo la-yanhal hai wo hal kar raha hun

jo lā-yanhal hai vo hal kar rahā huuñ

tabī'at apnī bojhal kar rahā huuñ

maiñ apnī 'umr nazr-e-ḳhār kar ke

tire bistar ko maḳhmal kar rahā huuñ

is ā.īne pe merā haq nahīñ hai

maiñ apnā 'aks ojhal kar rahā huuñ

tumhārī tishnagī kā qarz de kar

maiñ sahrāoñ ko jal-thal kar rahā huuñ

dar-e-dil par bahut sī dastakeñ haiñ

maiñ ḳhud hī dar muqaffal kar rahā huuñ

abhī anjām likhnā hī nahīñ hai

kahānī ko musalsal kar rahā huuñ

jo aañsū ḳhushk ho kar rah ga.e haiñ

unheñ āñkhoñ kā kājal kar rahā huuñ

mire zaḳhmoñ kī ḳhushbū kam na hogī

lahū ko aaj sandal kar rahā huuñ

sukūt-e-shab se le kar shor-e-mahshar

ġhamoñ ko she'r meñ hal kar rahā huuñ

pata shāyad kahīñ mil jaa.e us kā

adhūre ḳhat mukammal kar rahā huuñ

mohabbat 'aql par haavī hai 'az.har'

havās apne mo'attal kar rahā huuñ

jo la-yanhal hai wo hal kar raha hun

tabi'at apni bojhal kar raha hun

main apni 'umr nazr-e-KHar kar ke

tere bistar ko maKHmal kar raha hun

is aaine pe mera haq nahin hai

main apna 'aks ojhal kar raha hun

tumhaari tishnagi ka qarz de kar

main sahraon ko jal-thal kar raha hun

dar-e-dil par bahut si dastaken hain

main KHud hi dar muqaffal kar raha hun

abhi anjam likhna hi nahin hai

kahani ko musalsal kar raha hun

jo aansu KHushk ho kar rah gae hain

unhen aankhon ka kajal kar raha hun

mere zaKHmon ki KHushbu kam na hogi

lahu ko aaj sandal kar raha hun

sukut-e-shab se le kar shor-e-mahshar

ghamon ko she'r mein hal kar raha hun

pata shayad kahin mil jae us ka

adhure KHat mukammal kar raha hun

mohabbat 'aql par hawi hai 'azhar'

hawas apne mo'attal kar raha hun