ek muddat se wahi qalb-o-jigar dekhte hain

ek muddat se vahī qalb-o-jigar dekhte haiñ

zaḳhm ke vāste kuchh aur bhī ghar dekhte haiñ

aable paaoñ ke nazroñ meñ nahīñ haiñ yuuñ hī

isī ā.īne meñ ham shauq-e-safar dekhte haiñ

ḳhatm hotā hī nahīñ ham se kabhī kār-e-havas

bārhā un ko ba-andāz-e-digar dekhte haiñ

jism par rang-e-ḳhizāñ aur nikhar jaatā hai

naḳhl-e-jāñ par jo kabhī barg-o-samar dekhte haiñ

ham se baḌh kar bhī kahīñ hoñge aziyyat-talabāñ

phūñk kar ghar ko tamāshā-e-sharar dekhte haiñ

ruuh bhī vajd meñ aatī hai badan kī mānind

us ko raqsanda magar ahl-e-nazar dekhte haiñ

tan-ba-taqdīr haiñ baiThe hue ham ghar pe 'nadīm'

aur yahī hāl-e-zabūñ shām-o-sahar dekhte haiñ

ek muddat se wahi qalb-o-jigar dekhte hain

zaKHm ke waste kuchh aur bhi ghar dekhte hain

aable paon ke nazron mein nahin hain yun hi

isi aaine mein hum shauq-e-safar dekhte hain

KHatm hota hi nahin hum se kabhi kar-e-hawas

barha un ko ba-andaz-e-digar dekhte hain

jism par rang-e-KHizan aur nikhar jata hai

naKHl-e-jaan par jo kabhi barg-o-samar dekhte hain

hum se baDh kar bhi kahin honge aziyyat-talaban

phunk kar ghar ko tamasha-e-sharar dekhte hain

ruh bhi wajd mein aati hai badan ki manind

us ko raqsanda magar ahl-e-nazar dekhte hain

tan-ba-taqdir hain baiThe hue hum ghar pe 'nadim'

aur yahi haal-e-zabun sham-o-sahar dekhte hain