aankh se dil ke sote ubalte rahe huk uThti rahi ashk chalte rahe

aañkh se dil ke sote ubalte rahe huuk uThtī rahī ashk chalte rahe

kitnī zarḳhez thī ye zamīñ shahr kī vard ugte rahe zaḳhm phalte rahe

ye havā rang hai vo fazā rang hai ye tamannā vo terī adā rang hai

rang ne rang bāñdhe bahut 'ishq ke rang uḌte rahe dil badalte rahe

kitne ḳhush-rang āñkhoñ meñ ramte ga.e kitne āhang kānoñ meñ jamte ga.e

par vo manzar jo dil meñ machalte rahe par vo naġhme jo siine meñ palte rahe

go makānī hadeñ duur kartī ga.iiñ ham zamānī hadoñ meñ ham-āhang the

vo bhī rātoñ ko uTh uTh ke rotā rahā ham bhī har aan pahlū badalte rahe

maiñ añdheroñ kī duniyā meñ raushan rahā maiñ ujāloñ kī duniyā meñ maskan rahā

jitne sūraj mire dil meñ jalte rahe utne saa.e mire saath chalte rahe

ai ḳhirad-mand sun ham bhī do bhaa.ī the vo jo hākim bane ham jo rusvā hue

vo udhar lā'l-o-gauhar meñ tulte rahe ham idhar lā'l-o-gauhar ugalte rahe

tere baa'd aisī aisī havā.eñ chalīñ manziloñ manziloñ raah tārīk thī

aas ke jo diye tū ne raushan kiye aarzū ke shabistāñ meñ jalte rahe

haa.e vo qāfile nik.hat o nuur ke haa.e vo valvale shauq-e-majbūr ke

ham sar-e-rah-guzār-e-tarab-zār-e-dil pā-shikasta khaḌe haath malte rahe

vo udhar zulf-e-ḳhamdār ke silsile vo idhar shauq-e-bedār ke mashġhale

thī koī dhun jo rāteñ sulajhtī rahīñ thā koī shuġhl jo din bahalte rahe

pūchhte kyā ho 'bāqar' ke shām-o-sahar vo bahut dil-girafta the pahle magar

bas kisī taur mar mar ke jiite rahe bas kisī taur gir gir sañbhalte rahe

aankh se dil ke sote ubalte rahe huk uThti rahi ashk chalte rahe

kitni zarKHez thi ye zamin shahr ki ward ugte rahe zaKHm phalte rahe

ye hawa rang hai wo faza rang hai ye tamanna wo teri ada rang hai

rang ne rang bandhe bahut 'ishq ke rang uDte rahe dil badalte rahe

kitne KHush-rang aankhon mein ramte gae kitne aahang kanon mein jamte gae

par wo manzar jo dil mein machalte rahe par wo naghme jo sine mein palte rahe

go makani haden dur karti gain hum zamani hadon mein ham-ahang the

wo bhi raaton ko uTh uTh ke rota raha hum bhi har aan pahlu badalte rahe

main andheron ki duniya mein raushan raha main ujalon ki duniya mein maskan raha

jitne suraj mere dil mein jalte rahe utne sae mere sath chalte rahe

ai KHirad-mand sun hum bhi do bhai the wo jo hakim bane hum jo ruswa hue

wo udhar la'l-o-gauhar mein tulte rahe hum idhar la'l-o-gauhar ugalte rahe

tere ba'd aisi aisi hawaen chalin manzilon manzilon rah tarik thi

aas ke jo diye tu ne raushan kiye aarzu ke shabistan mein jalte rahe

hae wo qafile nikhat o nur ke hae wo walwale shauq-e-majbur ke

hum sar-e-rah-guzar-e-tarab-zar-e-dil pa-shikasta khaDe hath malte rahe

wo udhar zulf-e-KHamdar ke silsile wo idhar shauq-e-bedar ke mashghale

thi koi dhun jo raaten sulajhti rahin tha koi shughl jo din bahalte rahe

puchhte kya ho 'baqar' ke sham-o-sahar wo bahut dil-girafta the pahle magar

bas kisi taur mar mar ke jite rahe bas kisi taur gir gir sanbhalte rahe