zaKHm ko phul kahen nauhe ko naghma samjhen

zaḳhm ko phuul kaheñ nauhe ko naġhma samjheñ

itne saada bhī nahīñ ham ki na itnā samjheñ

zaḳhm kā apne mudāvā kise manzūr nahīñ

haañ magar kyuuñ kisī qātil ko masīhā samjheñ

sho.abada-bāzī kisī kī na chalegī ham par

tanz o dushnām ko kahte ho latīfa samjheñ

ḳhud pe ye zulm gavārā nahīñ hogā ham se

ham to sho.aloñ se na guzreñge na siitā samjheñ

chhoḌiye pairoñ meñ kyā lakḌiyāñ bāñdhe phirnā

apne qad se mirā qad shauq se chhoTā samjheñ

koī achchhā hai to achchhā hī kaheñge ham bhī

log bhī kyā haiñ zarā dekhiye kyā kyā samjheñ

ham to begāne se ḳhud ko bhī mile haiñ 'bilqīs'

kis tavaqqo pe kisī shaḳhs ko apnā samjheñ

zaKHm ko phul kahen nauhe ko naghma samjhen

itne sada bhi nahin hum ki na itna samjhen

zaKHm ka apne mudawa kise manzur nahin

han magar kyun kisi qatil ko masiha samjhen

shoabada-bazi kisi ki na chalegi hum par

tanz o dushnam ko kahte ho latifa samjhen

KHud pe ye zulm gawara nahin hoga hum se

hum to shoalon se na guzrenge na sita samjhen

chhoDiye pairon mein kya lakDiyan bandhe phirna

apne qad se mera qad shauq se chhoTa samjhen

koi achchha hai to achchha hi kahenge hum bhi

log bhi kya hain zara dekhiye kya kya samjhen

hum to begane se KHud ko bhi mile hain 'bilqis'

kis tawaqqo pe kisi shaKHs ko apna samjhen