zahid ke dil mein but hai musalman nahin raha

zāhid ke dil meñ but hai musalmāñ nahīñ rahā

ye barhaman hai sāhab-e-īmāñ nahīñ rahā

malte haiñ haath yaas se dast-e-junūñ mire

afsos koī tār-e-garebāñ nahīñ rahā

sad-shukr apne saath dil us ko bhī le gayā

jo chheḌtā thā ham ko vo armāñ nahīñ rahā

tasvīr-e-yār mujh ko tasavvur banā chukā

par shukr hai ḳhudā kā pareshāñ nahīñ rahā

pahuñchā diyā sabā ne use kū-e-yār meñ

apnā ġhubār be-sar-o-sāmāñ nahīñ rahā

lab-basta daf.atan jo huā zaḳhm-e-dil mirā

dilbar ke ḳhvān kā vo namak-dāñ nahīñ rahā

insāniyat hai jis meñ dilā hai vo aadmī

haivāniyat hai jis meñ vo insāñ nahīñ rahā

ifshā ye rāz-e-'ishq huā merī aah se

jis ko chhupā rahe the vo pinhāñ nahīñ rahā

'āshiq kī turbatoñ ko miTā kar ye kah diyā

lo ab nishān-e-gor-e-ġharībāñ nahīñ rahā

apnī sadā sunā ke har ik yaañ se chal basā

gulshan meñ koī murġh-e-ḳhush-ilhāñ nahīñ rahā

jo qaidī-e-mehan the 'jamīla' vo chal base

zindāñ meñ koī sāhab-e-zindāñ nahīñ rahā

zahid ke dil mein but hai musalman nahin raha

ye barhaman hai sahab-e-iman nahin raha

malte hain hath yas se dast-e-junun mere

afsos koi tar-e-gareban nahin raha

sad-shukr apne sath dil us ko bhi le gaya

jo chheDta tha hum ko wo arman nahin raha

taswir-e-yar mujh ko tasawwur bana chuka

par shukr hai KHuda ka pareshan nahin raha

pahuncha diya saba ne use ku-e-yar mein

apna ghubar be-sar-o-saman nahin raha

lab-basta dafatan jo hua zaKHm-e-dil mera

dilbar ke KHwan ka wo namak-dan nahin raha

insaniyat hai jis mein dila hai wo aadmi

haiwaniyat hai jis mein wo insan nahin raha

ifsha ye raaz-e-'ishq hua meri aah se

jis ko chhupa rahe the wo pinhan nahin raha

'ashiq ki turbaton ko miTa kar ye kah diya

lo ab nishan-e-gor-e-ghariban nahin raha

apni sada suna ke har ek yan se chal basa

gulshan mein koi murgh-e-KHush-ilhan nahin raha

jo qaidi-e-mehan the 'jamila' wo chal base

zindan mein koi sahab-e-zindan nahin raha