yun to sada-e-zaKHm baDi dur tak gai

yuuñ to sadā-e-zaḳhm baḌī duur tak ga.ī

ik chārāgar ke shahr meñ jā kar bhaTak ga.ī

ḳhushbū giraft-e-aks meñ laayā aur us ke baa'd

maiñ dekhtā rahā tirī tasvīr thak ga.ī

gul ko barahna dekh ke jhoñkā nasīm kā

jugnū bujhā rahā thā ki titlī chamak ga.ī

maiñ ne paḌhā thā chāñd ko injīl kī tarah

aur chāñdnī salīb pe aa kar laTak ga.ī

rotī rahī lipaT ke har ik sañg-e-mīl se

majbūr ho ke shahr ke andar saḌak ga.ī

qātil ko aaj sāhib-e-ejāz maan kar

dīvār-e-adl apnī jagah se sarak ga.ī

yun to sada-e-zaKHm baDi dur tak gai

ek chaaragar ke shahr mein ja kar bhaTak gai

KHushbu giraft-e-aks mein laya aur us ke ba'd

main dekhta raha teri taswir thak gai

gul ko barahna dekh ke jhonka nasim ka

jugnu bujha raha tha ki titli chamak gai

main ne paDha tha chand ko injil ki tarah

aur chandni salib pe aa kar laTak gai

roti rahi lipaT ke har ek sang-e-mil se

majbur ho ke shahr ke andar saDak gai

qatil ko aaj sahib-e-ejaz man kar

diwar-e-adl apni jagah se sarak gai