ye nikhaton ki narm-rawi ye hawa ye raat

ye nik.hatoñ kī narm-ravī ye havā ye raat

yaad aa rahe haiñ ishq ko TuuTe ta.alluqāt

māyūsiyoñ kī god meñ dam toḌtā hai ishq

ab bhī koī banā le to bigḌī nahīñ hai baat

kuchh aur bhī to ho in ishārāt ke sivā

ye sab to ai nigāh-e-karam baat baat baat

ik umr kaT ga.ī hai tire intizār meñ

aise bhī haiñ ki kaT na sakī jin se ek raat

ham ahl-e-intizār ke aahaT pe kaan the

ThanDī havā thī ġham thā tirā Dhal chalī thī raat

yuuñ to bachī bachī sī uThī vo nigāh-e-nāz

duniyā-e-dil meñ ho hī ga.ī koī vārdāt

jin kā surāġh pā na sakī ġham kī ruuh bhī

nādāñ hue haiñ ishq meñ aise bhī sānehāt

har sa.ī o har amal meñ mohabbat kā haath hai

ta.amīr-e-zindagī ke samajh kuchh muharrikāt

us jā tirī nigāh mujhe le ga.ī jahāñ

letī ho jaise saañs ye be-jān kā.enāt

kyā niiñd aa.e us ko jise jāgnā na aa.e

jo din ko din kare vo kare raat ko bhī raat

dariyā ke madd-o-jazr bhī paanī ke khel haiñ

hastī hī ke karishme haiñ kyā maut kyā hayāt

ahl-e-razā meñ shān-e-baġhāvat bhī ho zarā

itnī bhī zindagī na ho pāband-e-rasmiyāt

ham ahl-e-ġham ne rañg-e-zamāna badal diyā

koshish to kī sabhī ne magar ban paḌe kī baat

paidā kare zamīn na.ī āsmāñ nayā

itnā to le koī asar-e-daur-kā.enāt

shā.ir huuñ gahrī niiñd meñ haiñ jo haqīqateñ

chauñkā rahe haiñ un ko bhī mere tavahhumāt

mujh ko to ġham ne fursat-e-ġham bhī na dī 'firāq'

de fursat-e-hayāt na jaise ġham-e-hayāt

ye nikhaton ki narm-rawi ye hawa ye raat

yaad aa rahe hain ishq ko TuTe talluqat

mayusiyon ki god mein dam toDta hai ishq

ab bhi koi bana le to bigDi nahin hai baat

kuchh aur bhi to ho in ishaaraat ke siwa

ye sab to ai nigah-e-karam baat baat baat

ek umr kaT gai hai tere intizar mein

aise bhi hain ki kaT na saki jin se ek raat

hum ahl-e-intizar ke aahaT pe kan the

ThanDi hawa thi gham tha tera Dhal chali thi raat

yun to bachi bachi si uThi wo nigah-e-naz

duniya-e-dil mein ho hi gai koi wardat

jin ka suragh pa na saki gham ki ruh bhi

nadan hue hain ishq mein aise bhi sanehat

har sai o har amal mein mohabbat ka hath hai

tamir-e-zindagi ke samajh kuchh muharrikat

us ja teri nigah mujhe le gai jahan

leti ho jaise sans ye be-jaan kaenat

kya nind aae us ko jise jagna na aae

jo din ko din kare wo kare raat ko bhi raat

dariya ke madd-o-jazr bhi pani ke khel hain

hasti hi ke karishme hain kya maut kya hayat

ahl-e-raza mein shan-e-baghawat bhi ho zara

itni bhi zindagi na ho paband-e-rasmiyat

hum ahl-e-gham ne rang-e-zamana badal diya

koshish to ki sabhi ne magar ban paDe ki baat

paida kare zamin nai aasman naya

itna to le koi asar-e-daur-kaenat

shair hun gahri nind mein hain jo haqiqaten

chaunka rahe hain un ko bhi mere tawahhumat

mujh ko to gham ne fursat-e-gham bhi na di 'firaq'

de fursat-e-hayat na jaise gham-e-hayat