yar ko dida-e-KHun-bar se ojhal kar ke

yaar ko dīda-e-ḳhūñ-bār se ojhal kar ke

mujh ko hālāt ne maarā hai mukammal kar ke

jānib-e-shahr faqīroñ kī tarah koh-e-girāñ

pheñk detā hai buḳhārāt ko bādal kar ke

jal uTheñ ruuh ke ghaav to chhiḌak detā huuñ

chāñdnī meñ tirī yādoñ kī mahak hal kar ke

dil vo majzūb muġhannī ki jalā detā hai

ek hī aah se har ḳhvāb ko jal-thal kar ke

jaane kis lamha-e-vahshī kī talab hai ki falak

dekhnā chāhe mire shahr ko jañgal kar ke

ya.anī tartīb-e-karam kā bhī salīqa thā use

us ne patthar bhī uThāyā mujhe pāgal kar ke

iid kā din hai so kamre meñ paḌā huuñ 'aslam'

apne darvāze ko bāhar se muqaffal kar ke

yar ko dida-e-KHun-bar se ojhal kar ke

mujh ko haalat ne mara hai mukammal kar ke

jaanib-e-shahr faqiron ki tarah koh-e-giran

phenk deta hai buKHaraat ko baadal kar ke

jal uThen ruh ke ghaw to chhiDak deta hun

chandni mein teri yaadon ki mahak hal kar ke

dil wo majzub mughanni ki jala deta hai

ek hi aah se har KHwab ko jal-thal kar ke

jaane kis lamha-e-wahshi ki talab hai ki falak

dekhna chahe mere shahr ko jangal kar ke

yani tartib-e-karam ka bhi saliqa tha use

us ne patthar bhi uThaya mujhe pagal kar ke

id ka din hai so kamre mein paDa hun 'aslam'

apne darwaze ko bahar se muqaffal kar ke